پاکستان سمیت دنیا بھر میں آج ورلڈ بُک ڈے منایا جا رہا ہے

پاکستان سمیت دنیا بھر میں آج 23 اپریل کو ورلڈ بُک ڈے منایا جا رہا ہے۔
کتابوں کے عالمی دن کا منانے کا مقصد کتاب کی اہمیت کے بارے میں آگہی و شعور کو عام کرنا ہے۔ اقوامِ متحدہ کے ادارے یونیسکو کی جنرل کونسل نے1995 میں 23 اپریل کو ورلڈ بک ڈے قرار دیا۔
یوں دنیا کے اکثر ممالک میں کتابوں کا عالمی دن 23 اپریل کو منایا جاتا ہے، تاہم برطانیہ اور امریکا میں کتابوں کا عالمی دن 4 مارچ کو منایا جاتا ہے۔تاریخ بتاتی ہے کہ اس دن کو منانے کی شروعات 1616 میں سپین سے ہوئی۔ مشہور مقولہ ہے کہ ریڈرز ہی لیڈرز ہوتے ہیں، یہ جملہ کتابوں کی اہمیت کو واضح کرتا ہے۔
انٹرنیٹ اور دیگر عوامل کے باعث آج لوگوں میں کتاب بینی کا رجحان کم ہورہا ہے؛ حالانکہ انسانی شعور کے ارتقا میں کتب بینی کا مرکزی کردار ہے۔بلاشبہ ٹیکنالوجی اورانٹرنیٹ کے بڑھتے ہوئے استعمال کی وجہ سے کتب بینی کا رجحان پہلے جیسا نہیں رہا ،تاہم اب بھی ایسے لوگوں کی کمی نہیں، جو کتابوں کو اپنا اثاثہ سمجھتے ہیں اور باقاعدگی سے کتابیں پڑھتے اور جمع کرتے ہیں۔
ورلڈ بک ڈے کو منانے کا مقصد کتب بینی کے شوق کو فروغ دینا اور اچھی کتابیں تحریر کرنیوالے مصنفین کی حوصلہ افزائی کرنا بھی ہے۔