ایام حج کے دوران شدید گرمی کی لہر، عازمین کیلئے ہدایات جاری

حج سیزن کے دوران شدید گرمی کی پیشگوئی، عازمین حج کیلئے ہدایات جاری، عازمین حج گرمی سے بچاؤ کیلئے خود کو تیار رکھیں۔
ایشیائی ممالک کی طرح عرب ممالک بھی ان دنوں شدید گرمی کی لپیٹ میں ہیں اور حج سیزن کے دوران سعودی شہروں مکہ اور مدینہ میں شدید گرمی کی پیشگوئی کی گئی ہے۔
اس حوالے سےڈائریکٹر جنرل حج پاکستان نے عازمین حج کو گرمی کی سختی سے نمٹنے کیلئے چند ہدایات جاری کی ہیں،جن میں عازمین حج کو زیادہ پانی پی کر ہائیڈریشن کو برقرار رکھنے، کیفین اور چینی والی مشروبات کے زیادہ استعمال سے گریز کرنے کی ہدایت کی ہے،اس کے علاوہ عازمین حج کو ماسک، چھتری اوردھوپ کی عینک استعمال کرنے کا بھی کہا گیا ہے۔
دوسری جانب عرفات میں درجہ حرارت کم رکھنے کیلئے سڑکوں پر سفید رنگ کردیا گیا ہے۔