گرمی سےستائےشہریوں کیلئےخوشخبری،این ڈی ایم اےکابارشوں کاالرٹ جاری

گرمی سےستائےشہریوں کے لئے خوشخبری،این ڈی ایم اے نے بارشوں  کا  الرٹ جاری کردیا۔
این ڈی ایم اےکےالرٹ کےمطابق 13 سے 18 جون کے دوران اسلام آباد، راولپنڈی، پوٹھوہار اور خیبرپختونخوا، آزاد کشمیر اور گلگت بلتستان کے مختلف علاقوں میں بارش کا امکان ہے، جبکہ میدانی علاقوں میں شدید گرمی کی پیشگوئی کی گئی ہے۔
ایڈوائزری کے مطابق پنجاب کے زیادہ تر علاقوں میں 13 سے 16 جون تک شدید گرمی پڑنے کا امکان ہے، جبکہ اسلام آباد، راولپنڈی اور پوٹھوہار کے دیگر بالائی علاقوں میں بارش متوقع ہے۔
این ڈی ایم اے کی جانب سے خیبر پختونخواہ کے مختلف اضلاع میں بھی موسم گرم اور خشک رہنے کی پیشگوئی کی گئی ہے، تاہم بعض علاقوں جیسے چترال، دیر، سوات، پشاور، ایبٹ آباد، ہری پور، بنوں، نوشہرہ، وزیرستان اور دیگر میں آندھی اور بارش ہو سکتی ہے۔
سندھ اور بلوچستان کے بیشتر علاقوں میں بھی 13 سے 18 جون کے دوران شدید گرمی کی لہر جاری رہنے کا امکان ہے، گلگت بلتستان اور آزاد کشمیر کے کئی علاقے بھی گرمی کی لپیٹ میں رہیں گے، تاہم استور، سکردو، ہنزہ، شگر، باغ اور نیلم ویلی میں بارش ہونے کی توقع ہے۔
این ڈی ایم اے نے تمام متعلقہ اداروں کو ہدایت کی ہے کہ ممکنہ ہنگامی صورتحال سے نمٹنے کے لیے پیشگی اقدامات یقینی بنائیں۔
عوام سے کہا گیا ہے کہ شدید گرمی کے دوران احتیاطی تدابیر اختیار کریں، دھوپ میں بلا ضرورت باہر نکلنے سے گریز کریں، پانی اور مشروبات کا زیادہ استعمال کریں اور بچوں، بزرگوں اور بیمار افراد کا خاص خیال رکھیں۔