دھوپ کی مدد سے خود کی مرمت کرنے والی سڑک تیار

جنوبی کوریا کی انقلابی ایجاد،دھوپ کی مدد سے خود کی مرمت کرنیوالی سڑک تیار،یہ سڑک صرف سورج کی روشنی کا استعمال کرتے ہوئے خود کو ٹھیک کر سکتی ہے۔
جنوبی کوریا نے ایسی سڑکیں متعارف کروادیں، جو سورج کی روشنی سے خود بخود اپنی مرمت کر سکتی ، یعنی اب گڑھے بھرنے، دراڑیں ٹھیک کرنے، مشینری بلانے یا ٹریفک روکنے کی ضرورت نہیں رہے گی۔
یہ حیران کن سڑک ایک خاص قسم کی اسفالٹ (asphalt) سے بنائی جاتی ہے، جس میں نینو سائز کے کیپسول شامل کیے جاتے ہیں، ان کیپسولز میں پولیمر اور آئل پر مبنی ایک خاص مرکب موجود ہوتا ہے۔ جب سورج کی روشنی سڑک پر پڑتی ہے تو حرارت اور الٹرا وائلٹ شعاعیں ان کیپسولز کو فعال کرتی ہیں، جس کے نتیجے میں مرکب خارج ہو کر دراڑوں یا گڑھوں میں بھر جاتا ہے اور جیسے ہی سطح ٹھنڈی ہوتی ہے، وہ دوبارہ سخت ہو جاتی ہے، بالکل ویسے ہی جیسے نیا اسفالٹ بچھایا گیا ہو۔حیران کن بات یہ ہے کہ دوپہر کی دھوپ میں یہ سڑک صرف 45 منٹ کے اندر سینٹی میٹر چوڑے گڑھے خود سے بھر سکتی ہے اور یہ عمل سردیوں میں بھی مؤثر ہے کیونکہ برف پگھلنے کے بعد جو حرارت پیدا ہوتی ہے، وہی مرمتی عمل کو شروع کر دیتی ہے۔
یہ سڑک نا صرف خود کو مرمت کرتی ہے، بلکہ اس میں جدید سینسرز بھی نصب ہیں جو درجہ حرارت، نمی، ٹریفک کے بوجھ اور ساختی دباؤ کو مسلسل مانیٹر کرتے ہیں،اگر کہیں داخلی نقصان کا خدشہ ہو تو یہ سڑک خود بخود ایل ای ڈی لائٹس کے ذریعے خبردار کرتی ہے یا سڑک کی مرمت کرنیوالی ٹیموں کو براہِ راست ڈیجیٹل نوٹیفکیشن بھیجتی ہے۔ دلچسپ بات یہ ہے کہ اکثر صورتوں میں مرمت کا عمل اتنی جلدی مکمل ہو جاتا ہے کہ انسانی مداخلت کی ضرورت ہی نہیں پڑتی ہے۔