نئے اے آئی فیچرز سے یوٹیوب صارفین کیلئے شارٹس بنانا بہت آسان

سوشل میڈیا صارفین کیلئے خوشخبری،نئے اے آئی فیچرز سے یوٹیوب شارٹس بنانا بہت آسان ہو گیا۔
یوٹیوب نے اپنے شارٹس پلیٹ فارم کیلئے آرٹی فیشل انٹیلی جنس (اے آئی) ٹیکنالوجی پر مبنی نئے ٹولز متعارف کروادئیے۔ان ٹولز کا مقصد شارٹس ویڈیوز کی تیاری کو زیادہ بہتر اور یوزر فرینڈلی بنانا ہے۔ان میں سے ایک فیچر فوٹو ٹو ویڈیو ہے، جس سے صارفین اپنے فون کیمرا رول میں موجود ساکت تصاویر کو انیمیٹڈ شارٹ ویڈیوز میں تبدیل کرسکتے ہیں۔
ان ویڈیوز میں لوگ حرکت کر رہے ہوں گے، جبکہ مختلف ایفیکٹس اور ٹیمپلیٹس کو بھی استعمال کیا جا سکے گا۔یہ فیچر ابھی امریکا، کینیڈا، آسٹریلیا اور نیوزی لینڈ میں متعارف کروایا گیا ہے،تاہم کمپنی رواں سال کسی بھی وقت دنیا بھر میں اسے متعارف کروادے گی۔
کمپنی کے مطابق نئے اے آئی ٹولز سے مواد کی تیاری کا عمل ہر ایک کیلئے آسان اور پرلطف ہو جائے گا۔
یوٹیوب کی جانب سے نئے اے آئی جنریٹیو ایفیکٹس بھی صارفین کیلئے متعارف کروائے جا رہے ہیں، جن سے صارفین کافی کچھ کرسکیں گے۔جیسے وہ زیرآب ماحول کو متحرک کرسکیں گے یا کسی سنگل سیلفی کو ٹوئن میں تبدیل کر دیں گے۔ان ٹولز کو گوگل کے ویو 2 ماڈل سے پاور فراہم کی جائے گی، جبکہ کچھ عرصے بعد انہیں ویو 3 سے اپ گریڈ کر دیا جائے گا۔
ایفیکٹس سے ہٹ کر یوٹیوب کی جانب سے اے آئی پلے گراؤنڈ کو بھی متعارف کروایا جا رہا ہے۔یہ ایک ایسا مرکزی ہب ہے، جہاں صارفین جنریٹیو اے آئی ٹولز پر تجربات کرسکیں گے۔اس ہب تک رسائی یوٹیوب ایپ میں Create بٹن پر کلک کرنے سے ہوگی، مگر ایسا آئندہ چند ہفتوں میں ہوگا۔