ملک میں خشک موسم برقرار، پنجاب میں سموگ بڑھنے کی پیشگوئی

محکمہ موسمیات نے پیشگوئی کی ہے کہ ملک کے بیشتر علاقوں میں خشک موسم کا سلسلہ جاری رہے گا، جبکہ شمالی اور پہاڑی علاقوں میں سردی میں اضافہ متوقع ہے۔اور پنجاب میں سموگ مزید بڑھنے کی توقع بھی ہے۔
محکمہ موسمیات کے مطابق مسلسل خشک موسم اور فضائی آلودگی میں اضافے کے باعث پنجاب کے کئی اضلاع میں سموگ کی شدت مزید بڑھ سکتی ہے۔متاثرہ اضلاع میں لاہور، فیصل آباد، سیالکوٹ، شیخوپورہ، قصور، اوکاڑہ، گجرات، ساہیوال، ملتان، رحیم یار خان اور بہاولپور شامل ہیں۔
محکمہ موسمیا ت کاکہناہےکہ اسلام آباد اور گردونواح میں موسم خشک ،جبکہ صبح و شام کے اوقات میں خنکی برقرار رہنے کا امکان ہے، تاہم بارش کے امکانات نہ ہونے کے برابر ہیں۔اسی طرح سندھ کے بیشتر حصوں میں موسم گرم اور خشک رہے گا، جبکہ جنوبی ساحلی علاقوں جیسے کراچی اور ٹھٹھہ میں جزوی طور پر بادل چھائے رہنے کی توقع ہے۔
موسم کاحال بتانےوالوں کاکہناہےکہ خیبر پختونخوا میں بھی مجموعی طور پر خشک موسم رہے گا، تاہم صبح کے اوقات میں صوابی، مردان، نوشہرہ، چارسدہ اور پشاور میں دھند پڑنے کا امکان ہے۔بلوچستان کے شمالی حصوں میں موسم خشک اور سرد رہنے کی پیشگوئی کی گئی ہے، جبکہ کشمیر اور گلگت بلتستان میں بھی موسم سرد اور خشک رہے گا۔
ماہرین موسمیات کا کہنا ہے کہ بارش نہ ہونے اور فضائی آلودگی میں اضافے سے پنجاب کے وسطی و مشرقی علاقوں میں سموگ کی صورتحال آئندہ دنوں میں مزید خراب ہوسکتی ہے، لہٰذاشہریوں کو مشورہ دیا گیا ہے کہ وہ غیر ضروری طور پر باہر نکلنے سے گریز کریں، خصوصاً صبح اور شام کے اوقات میں جب سموگ کی شدت زیادہ ہوتی ہے، حفاظتی ماسک کا استعمال کریں اور سفر کم سے کم کریں۔