میٹرک کےسالانہ امتحان کا آغاز کب ہو گا؟تاریخ سامنے آ گئی

طلبا و طالبات کیلئے اہم خبر،میٹرک کےسالانہ امتحان کا آغاز کب ہو گا؟ممکنہ تاریخ سامنے آ گئی۔
پنجاب بھر کے تمام تعلیمی بورڈز نے میٹرک امتحانات 2026 کا شیڈول جاری کر دیا ۔ صوبے کے تمام بورڈز آف انٹرمیڈیٹ اینڈ سیکنڈری ایجوکیشن کے مطابق سیکنڈری سکول سرٹیفکیٹ (ایس ایس سی) پارٹ ون اور پارٹ ٹو کے پہلے سالانہ امتحانات آئندہ سال 3 مارچ سے شروع ہوں گے۔امیدواروں کو ہدایت کی گئی ہے کہ وہ اپنی درخواستیں صرف آن لائن سسٹم کے ذریعے جمع کرائیں، کیونکہ کسی بھی صورت میں دستی فارم یا ہاتھ سے جمع کرائے گئے چالان قبول نہیں کیے جائیں گے۔
اعلامیے میں مزید کہا گیا ہے کہ سرکاری اور نجی تعلیمی ادارے اپنے متعلقہ بورڈز کی سرکاری ویب سائٹس سے تفصیلی رہنمائی حاصل کریں۔ تمام سکولوں کو پابند کیا گیا ہے کہ داخلہ فارم، پرنٹ شدہ کاپیاں اور بینک میں جمع شدہ فیس چالان متعلقہ بورڈز میں جمع کرائیں، تاکہ کسی قسم کی تاخیر یا تکنیکی مسئلے سے بچا جا سکے۔
بورڈز حکام کے مطابق یہ اقدامات امتحانی نظام میں شفافیت، سہولت اور کارکردگی کو بہتر بنانے کیلئے کیے جا رہے ہیں، اس سے نا صرف طلبا اور سکول انتظامیہ کو آسانی ہوگی ،بلکہ پورے امتحانی عمل کو ڈیجیٹل نظام کے تحت زیادہ منظم اور مؤثر بنایا جا سکے گا۔
طلبا اور والدین کو مشورہ دیا گیا ہے کہ وہ کسی بھی دشواری سے بچنے کیلئے آن لائن فارم مقررہ مدت کے اندر جمع کرائیں، تاکہ رول نمبر سلپس اور دیگر امتحانی کارروائیاں بروقت مکمل کی جا سکیں۔
تعلیمی ذرائع کے مطابق پنجاب کے تمام نو تعلیمی بورڈز، بشمول لاہور، راولپنڈی، فیصل آباد، گوجرانوالہ، ملتان، بہاولپور، ساہیوال، ڈی جی خان اور سرگودھا اس مشترکہ شیڈول پر عمل کریں گے۔