ایئرکرافٹ انجینئرز کی ہڑتال، پھر بھی پی آئی اے کی پروازیں بحال

ایئرکرافٹ انجینئرز کی ہڑتال، متبادل اقدامات سے پی آئی اے کی پروازیں بحال،پاکستان انٹرنیشنل ایئرلائنز (پی آئی اے) نے انجینئرنگ شعبے میں ’’کام چھوڑ ہڑتال‘‘ کے باوجود متبادل انتظامات کے تحت اپنا فضائی آپریشن بحال کر دیا ۔
پی آئی اے کے ترجمان کے مطابق اسلام آباد سے دمام جانیوالی پرواز پی کے 245 اور اسلام آباد سے جدہ جانیوالی پی کے 761 سمیت دیگر پروازیں بھی روانہ کر دی گئیں۔
ترجمان پی آئی اے کے مطابق باقی پروازوں کے ٹیک لاگز کلیئر کر کے انہیں بھی مرحلہ وار روانہ کیا جا رہا ہے، جبکہ پی آئی اے کی انتظامیہ ایئرپورٹس پر موجود ہے، تاکہ مسافروں کو کسی قسم کی پریشانی کا سامنا نہ کرنا پڑے۔
انہوں نے واضح کیا کہ کسی بھی طبقے کو مسافروں کو زحمت دینے یا پروازوں کی روانگی میں رکاوٹ ڈالنے کی اجازت نہیں دی جائے گی۔
ترجمان کا کہنا ہے کہ سوسائٹی آف ایئرکرافٹ انجینئرز کا کوئی قانونی وجود نہیں اور کام چھوڑنے کی اس تحریک کا مقصد آخری مراحل میں داخل ہو جانیوالی پی آئی اے کی نجکاری کو سبوتاژ کرنا ہے۔
انتظامیہ کے مطابق متبادل انجینئرنگ خدمات دیگر ایئرلائنز سے حاصل کی جا رہی ہیں، اور جلد ہی پی آئی اے کی تمام پروازیں معمول کے مطابق روانہ کر دی جائیں گی۔