چین میں سڑکوں سے بجلی پیدا کرنے کی جدید ٹیکنالوجی متعارف

چین نے سمارٹ انفراسٹرکچر کے میدان میں ایک اور پیش رفت کرتے ہوئے ایسی سڑکوں کی ٹیکنالوجی پر کام کیا ہے جو نہ صرف ٹریفک کا دباؤ برداشت کرتی ہیں بلکہ شمسی توانائی بھی پیدا کرتی ہیں۔

ماہرین کے مطابق ان جدید سڑکوں میں سولر پینلز کو سڑک کے ڈھانچے کے اندر شامل کیا گیا ہے، جو سورج کی روشنی کو جذب کر کے بجلی پیدا کرتے ہیں، جبکہ اسی سطح سے گاڑیاں بھی گزرتی ہیں۔

حکام کا کہنا ہے کہ یہ بجلی قریبی اسٹریٹ لائٹس اور عوامی انفراسٹرکچر کو فراہم کی جا رہی ہے، جس سے روایتی بجلی کے استعمال میں کمی لانے میں مدد مل رہی ہے۔

انجینئرنگ ماہرین کے مطابق ایسی سڑکیں تیار کرنا ایک بڑا تکنیکی چیلنج ہے کیونکہ انہیں مسلسل بھاری ٹریفک، دباؤ اور رگڑ کے باوجود اپنی مضبوطی اور کارکردگی برقرار رکھنی ہوتی ہے۔

رپورٹس کے مطابق چین اس ٹیکنالوجی کو مختلف منصوبوں میں آزما رہا ہے تاکہ مستقبل کے اسمارٹ سٹیز میں کم جگہ میں زیادہ توانائی پیدا کی جا سکے۔

ماہرین کا کہنا ہے کہ اگر یہ نظام بڑے پیمانے پر کامیاب ہوتا ہے تو یہ شہری انفراسٹرکچر اور توانائی کے شعبے میں ایک بڑی تبدیلی ثابت ہو سکتا ہے۔