سپین کی طرف سے پاکستانی طلبا کیلئےمکمل فنڈڈ سکالرشپ کا اعلان

بیرون ملک جا کر تعلیم حاصل کرنے کے خواہشمند طلبا و طالبات کیلئے خوشخبری ،سپین نے پاکستانی طلبا کیلئےمکمل فنڈڈ سکالرشپ کا اعلان کر دیا۔
سپین کی معروف یونیورسٹی پونٹیفیشیا کومیلاس(Universidad Pontificia Comillas) نے 2026 کیلئے پاکستانی امیدواروں سمیت بین الاقوامی طلبا کیلئے مکمل طور پر فنڈڈ پی ایچ ڈی سکالرشپ کا اعلان کر دیا۔
یونیورسٹی کے مطابق یہ وظائف ان طلبا کیلئے مختص ہیں، جو عالمی سطح پر معاشیات، اختراعات اور پائیداری جیسے تحقیقی شعبوں میں اپنا کیریئر بنانا چاہتے ہیں۔ پروگرام کے تحت منتخب امیدواروں کو 23,463 یورو کا سالانہ وظیفہ، 90 فیصد ٹیوشن فیس کی چھوٹ، ہیلتھ انشورنس، ریسرچ ورک سپیس، لیپ ٹاپ اور بین الاقوامی سفری الاؤنس فراہم کیا جائے گا۔ سکالرشپ چار سال کی مدت کیلئے ہوگی، جس کی کارکردگی کی بنیاد پر ہر سال تجدید کی جاسکتی ہے۔
یونیورسٹی انتظامیہ کے مطابق یہ سکالرشپ ڈیجیٹل اکانومی، سرکلر اکانومی اینڈ انرجی، بینکنگ ریگولیشن، ہیومن اینیمل ریلیشنز اور سوشل چینج میں دستیاب ہے۔ درخواست دہندگان کے پاس بیچلر یا ماسٹر ڈگری ،کم از کم 300 ECTS کریڈٹ کے ساتھ اور انگریزی میں C1 لیول کا سرٹیفکیٹ پیش کرنا ضروری ہے۔ہسپانوی زبان کی مہارتیں لازمی نہیں، لیکن ہسپانوی بولنے والوں کواضافی ترجیح دی جائے گی۔ اس کے علاوہ امیدواروں کو ایک جامع تحقیقی تجویز، دو ریفری خطوط اور تعلیمی سرٹیفکیٹ جمع کروانا ہوں گے۔
ترجمان کے مطابق یہ یونیورسٹی میڈرڈ کے قلب میں واقع ہے اور یہ تحقیق، اختراعات اور بین الاقوامی تعاون کے امتزاج کیلئے مشہور ہے۔ سکالرشپ کے تحت منتخب طالبعلم کو تحقیقی منصوبوں میں شامل کیا جائے گا، جن کے نتائج عالمی اہمیت کے حامل ہوں گے۔دلچسپی رکھنے والے امیدوار یونیورسٹی کے آفیشل پورٹل کے ذریعے آن لائن درخواست جمع کر سکتے ہیں۔
یونیورسٹی انتظامیہ کے مطابق درخواستوں کا رولنگ کی بنیاد پر جائزہ لیا جائے گا۔