دبئی: جدید ٹیکنالوجی اور روبوٹکس والا دنیا کا سب سے شاندار سکول

طلبا وطالبات کیلئے اہم خبر،دبئی میں جدید ٹیکنالوجی اور روبوٹکس والا دنیا کا شاندار سکول توجہ کا مرکز بن گیا۔
دبئی کے جیمز سکول آف ریسرچ اینڈ انوویشن کو جدید ٹیکنالوجی، روبوٹکس اور تعلیم کے معیار کی بدولت دنیا کے بہترین سکولوں میں شمار کیا جا رہا ہے۔ یہ سکول 47,600 مربع میٹر پر محیط ہے اور اس کی تعمیر پر تقریباً 100 ملین ڈالر کی لاگت آئی ۔
ایک رپورٹ کے مطابق اس سکول میں طلبا کو مصنوعی ذہانت کی لیبز، روبوٹکس، ای سپورٹس، پرفارمنگ آرٹس اور جسمانی کھیلوں کی جدید سہولیات فراہم کی گئی ہیں ،تاکہ وہ مستقبل کے رہنما بن سکیں۔ سکول میں تعلیم دینے والے اساتذہ اور رہنماؤں میں صنعتی اور علمی ماہرین شامل ہیں، تاکہ طلبا کو عملی اور تخلیقی علوم میں مہارت دی جا سکے۔
سکول کا نصاب برطانوی نظام تعلیم پر مبنی ہے، تاہم اس میں جدید تحقیق اور تخلیق پر مبنی ماڈل بھی شامل کیا گیا ہے۔ سکول کی سالانہ فیس تقریباً ایک لاکھ سولہ ہزار درہم سے شروع ہوتی ہے اور اعلیٰ کلاسز کیلئے دو لاکھ چھ ہزار درہم تک جا سکتی ہے۔سکول میں ایک بلند فٹبال میدان، اولمپک سائز سوئمنگ پول، باسکٹ بال کورٹ، روبوٹکس لیبز، ڈیزائن سٹوڈیوز اور تحقیقاتی مراکز موجود ہیں اور کیمپس میں شمسی توانائی اور جدید پانی کی بچت کے نظام نصب کیے گئے ہیں۔جیمز ایجوکیشن کے بانی اور چیئرمین کے مطابق یہ سکول آنیوالے کل کے کلاس روم کی بہترین مثال ہے، جہاں ہر طالبعلم کو تخلیق، قیادت اور تحقیق کے مواقع میسر ہوں گے۔