پاکستان اور سعودی عرب میں اقتصادی تعاون بڑھانے پر اتفاق

پاکستان اور سعودی عرب نے اقتصادی تعاون کے ایک جامع فریم ورک کے آغاز کا اعلان کردیا ہے۔
ریاض میں وزیراعظم شہباز شریف اور سعودی ولی عہد شہزادہ محمد بن سلمان کے درمیان ملاقات ہوئی، جس کے بعد مشترکہ اعلامیہ جاری کیا گیا۔
دفترِ خارجہ کے مطابق اس فریم ورک کا مقصد دونوں ممالک کے درمیان تاریخی شراکت داری کو مزید مضبوط بنانا ہے۔
فریم ورک کے تحت اقتصادی، تجارتی، سرمایہ کاری اور ترقیاتی منصوبوں پر گفت و شنید ہوگی، جبکہ توانائی، صنعت، کان کنی، آئی ٹی، سیاحت، زراعت اور فوڈ سیکیورٹی کو ترجیحی شعبوں کے طور پر شامل کیا گیا ہے۔
دفترِ خارجہ نے بتایا کہ دونوں ممالک کے درمیان بجلی کی ترسیل سے متعلق منصوبے پر مفاہمتی یادداشت (MoU) کی تیاری جاری ہے، جب کہ توانائی کے شعبے میں تعاون کے لیے ایک اور مفاہمتی یادداشت پر بھی کام ہورہا ہے۔
اعلامیے کے مطابق پاکستان اور سعودی عرب پائیدار شراکت داری کے قیام کے خواہاں ہیں، اور دونوں ممالک کی قیادت اعلیٰ سطح سپریم کوآرڈینیشن کونسل کے اجلاس کے منتظر ہیں۔