طلبا کیلئے خوشخبری: میٹرک اور انٹر کیلئے نیا گریڈنگ سسٹم متعارف

طلبا و طالبات کیلئے اہم خبر،اب نمبرز کی بجائے گریڈ دیا جائے گا،انٹر بورڈز کوآرڈی نیشن کمیشن نے ملک میں میٹرک اور انٹر میں نیا گریڈنگ سسٹم متعارف کرادیا۔
چیئرمین انٹر بورڈز کوآرڈی نیشن کمیشن غلام علی ملاح کے مطابق 2024 میں پہلے مرحلے میں نویں اور گیارہویں جماعت کےطلبا کو نمبرز کی بجائےگریڈ دیا جائےگا، جبکہ مارک شیٹ یا رزلٹ کارڈ میں فیل کا لفظ بھی شامل نہیں ہوگا۔
انہوں نے کہا کہ دنیا بھر میں گریڈ سسٹم موجود ہے، بچوں کو نمبرز کی دوڑ سے نکال کرانہیں اچھی تعلیم دینی ہے، نمبرز سسٹم کےمتبادل گریڈنگ سسٹم طلبا کیلئے زیادہ فائدہ مند ثابت ہوگا۔
چیئرمین انٹر بورڈز کوآرڈی نیشن کمیشن کے بقول اس فیصلے کے تحت نیا 10 پوائنٹ گریڈنگ سسٹم ہوگا، جس کو طلبا کی کارکردگی جانچنے کیلئے پانچ رینک میں تقسیم کیا گیا ہے، جو 2025 میں دوسرے مرحلے میں دسویں اور بارہویں جماعت میں بھی نافذ کیا جائے گا۔
ان کا کہنا تھا کہ ہم پاسنگ مارکس 33 سے بڑھا کر 40 کر رہے ہیں، تا کہ تعلیمی معیار بہتر ہو اور مرحلہ وار اس میں مزید اضافہ کریں گے ،جبکہ کوشش ہے پاسنگ مارکس کو 50 فیصد تک بھی لے جائیں، تاہم طلبا کا نتیجہ جس مضمون میں خراب آئے گا، وہ دوبارہ اس سبجیکٹ کا امتحان دے سکے گا، اس میں سپلیمنٹری کے نام کی بجائے سالانہ امتحان ہی آئے گا، اب سپلی کا ٹیگ ختم کردیا ہے۔
انہوں نے کہا ہم چاہتے ہیں کہ طلبا کریکولم سیکھیں مارکس کی دوڑ میں نہ رہیں، بین الاقوامی سطح پر گریڈنگ سسٹم ہی ہوتا ہے۔