ٹک ٹاکرز کیلئے خوشخبری :صارفین اب زیادہ پیسے کماسکیں گے

ٹک ٹاکرز کیلئے بڑی خوشخبری،ٹک ٹاک صارفین اب اس ویڈیو شیئرنگ ایپ سے زیادہ پیسے کماسکیں گے۔ایسا ٹک ٹاک پلیٹ فارم کے سبسکرپشن ماڈل میں تبدیلی سے ممکن ہوگا۔
امریکا میں منعقدہ ایک کانفرنس کے دوران کمپنی کی جانب سے اعلان کیا گیا کہ اب صارفین سبسکرپشنز سے ہونیوالی آمدنی کا 90 فیصد حصہ کما سکیں گے،مگر اس کیلئے چند شرائط کو پورا کرنا ضروری ہوگا۔ابھی ٹک ٹاک سبسکرپشنز کی آمدنی کا 70 فیصد حصہ صارفین کو دیا جاتا ہے ،مگر اب اس میں 20 فیصد اضافہ کیا جائے گا۔اس مقصد کیلئےضروری ہوگا کہ صارف کے فالوورز کی تعداد کم از کم 10 ہزار ہوں، گزشتہ ماہ اس کی ویڈیوز کے ویوز کم از کم ایک لاکھ ہوں اور گزشتہ ماہ اس نے 3 یا اس سے زائد سبسکرپشن اونلی ویڈیوز پوسٹ کی ہوں۔
کمپنی کے مطابق جتنا زیادہ تسلسل سے صارفین کام کریں گے، اتنا زیادہ کماسکیں گے، سبسکرپشن سے صارفین کو زیادہ مضبوط کمیونٹیز تشکیل دینے میں مدد ملتی ہے، جبکہ ماہانہ سبسکرپشن فیس سے ان کے فالوورز کو خصوصی مراعات جیسے سپیشل بیجز، سبسکرائبر اونلی پوسٹس، چیٹ فیچرز اور دیگر تک رسائی ملتی ہے۔
سبسکرپشن پروگرام کیلئے اس تبدیلی کا اطلاق ابھی امریکا اور کینیڈا میں کیا جا رہا ہے، تاہم کمپنی کا کہنا ہے کہ آنیوالے مہینوں میں اسے دیگر ممالک میں بھی متعارف کروایا جائے گا۔