گوگل فوٹوز میں نیااور زبردست ویڈیو ایڈیٹنگ فیچر متعارف

گوگل کے صارفین کیلئے بڑی خوشخبری ،گوگل  فوٹوز نے اپنے صارفین کیلئے ویڈیو ایڈیٹنگ کو مزید آسان اور جامع بنانے کیلئے تازہ اپ ڈیٹ جاری کر دی ۔
گوگل فوٹوز کے مطابق صارفین کو ویڈیو کلپس یا تصاویر کو الگ ایڈیٹر ایپ میں بھیجنے کی ضرورت نہیں، بلکہ وہ گوگل فوٹوز کھول کر چند لمحوں میں ہائی لائٹ ویڈیو تیار کر سکتے ہیں۔نئے ایڈیٹر میں پری سیٹ ٹیمپلیٹس، بیک گراؤنڈ میوزک، ٹیکسٹ اوورلیز اور ملٹی کلپ ٹائم لائن جیسی خصوصیات شامل کی گئی ہیں، جو پہلے صرف کمپیوٹر پر دستیاب تھیں۔
صارفین اب تصاویر اور ویڈیوز منتخب کر کے ایک ٹیمپلیٹ کا انتخاب کریں،اور گوگل فوٹوز خود بخود کلپس، میوزک اور ٹیکسٹ کو ہم آہنگ کر کے ایک پروفیشنل نظر آنے والی ویڈیو تیار کر دے گا۔ یہ نیا فیچر اینڈرائیڈ اور آئی او ایس دونوں صارفین کے لیے دستیاب ہے۔نئی اپ ڈیٹ کے ذریعے گوگل فوٹوز وہ تمام بنیادی اور جدید ٹولز فراہم کرتا ہے، جو پہلے صارفین کو الگ تلاش کرنے پڑتے تھے۔
اب فون پر براہِ راست ویڈیوز کاٹنے، ترتیب دینے، میوزک اور ٹیکسٹ شامل کرنے اور ہائی لائٹ ویڈیوز بنانے کا عمل انتہائی آسان ہو گیا ہے۔ اپ ڈیٹ خاص طور پر ان صارفین کیلئےفائدہ مند ہے، جو سوشل میڈیا پر اپنی ویڈیوز پوسٹ کرنا یا یادگار لمحات کو فلمی انداز میں محفوظ کرنا چاہتے ہیں۔ گوگل فوٹوز کی یہ نئی صلاحیت اسے ایک جامع اور آسان ویڈیو ایڈیٹنگ ٹول بناتی ہے، جو موبائل پر فوری اور پروفیشنل نتائج فراہم کرتا ہے۔