عازمین حج کو حرمین ریلوے کی سہولت فراہم کرنے کا فیصلہ

سعودی عرب میں جدیدسفری سہولت کی فراہمی کا سلسلہ،حج سیزن میں لاکھوں عازمین کو حرمین ریلوے کی سہولت فراہم کرنے کا فیصلہ کرلیاگیا۔
سعودی عرب کے نائب وزیرٹرانسپورٹ و لاجسٹک سروسز اور ٹرانسپورٹ اتھارٹی کے چیئرمین رمیح الرمیح نے کہا ہے کہ حج سیزن میں عازمین کی ٹرانسپورٹیشن کا پروگرام ان کے گھروں سے نکلنے اور واپسی تک ہوتا ہے۔
جدہ میں حج و عمرہ نمائش و کانفرنس 2025 کے ایک سیشن سے خطاب کرتے ہوئے انہوں نے کہا فضائی ذریعے سے عازمین حج کیلئے 30 لاکھ نشستوں کا انتظام کیا جاتا ہے۔
رپورٹ کے مطابق سامان کے بغیرحج کا گزشتہ تجربہ کافی کامیاب رہا ،جس سے گزشتہ برس سات لاکھ حجاج مستفیض ہوئے۔اس سال حج سیزن میں اس کے دائرہ عمل میں مزید اضافہ کرتے ہوئے 10 لاکھ عازمین تک یہ سہولت پہنچانے کا ارادہ ہے۔
نائب وزیر کا حرمین ریلوے سروس کے بارے میں کہنا ہے کہ گزشتہ برس 10 ملین مسافروں کو یہ سہولت فراہم کی گئی، جبکہ اس سال ہمارا ہدف 20 ملین تک کا ہے۔