حکومت کیساتھ مذاکرات کامیاب:گڈزٹرانسپورٹرزکاہڑتال ختم کرنےکااعلان

پنجاب حکومت کے ساتھ مذاکرات کامیاب ہونےکے بعد گڈز ٹرانسپورٹرز نے صوبے میں ہڑتال ختم کرنے کا اعلان کردیا۔
مذاکرات کے بعد وزیراعلیٰ پنجاب مریم نواز نے ٹرانسپورٹرز کے مسائل کے حل کے لیے اعلیٰ سطح کی کمیٹی تشکیل دے دی۔کمیٹی کی سربراہی پنجاب کی سینئر وزیر مریم اورنگزیب کریں گی جبکہ ٹرانسپورٹرز کے نمائندوں کو بھی اس میں شامل کیا گیا ہے۔ کمیٹی کا پہلا اجلاس آج مریم اورنگزیب اور ٹرانسپورٹر نمائندوں کی موجودگی میں ہوگا۔
مریم اورنگزیب کا کہنا تھا کہ مسائل کو افہام و تفہیم سے حل کیا جائے گا، حکومت کا مقصد انسانی زندگی کا تحفظ اور شہریوں کے لیے بہتر حالات فراہم کرنا ہے۔
یاد رہے کہ 8 دسمبر کو پاکستان ٹرانسپورٹ متحدہ ایکشن کمیٹی نے ٹریفک آرڈیننس کیخلاف لاہور سمیت پنجاب بھر میں ہڑتال کی کال دی تھی۔8دسمبر کو رات گئے سے دوپہر تک پنجاب میں ٹرانسپورٹرز کی ہڑتال جاری رہی، اس دوران پبلک ٹرانسپورٹ بند کی گئی،گڈز ٹرانسپورٹ، منی مزدا، لوڈرز اور رکشے بھی ہڑتال میں شامل تھے۔ انٹرا سٹی، بین الاضلاعی اور بین الصوبائی ٹرانسپورٹ بند رہی۔