پنجاب کے تعلیمی بورڈز کے امتحانات کا شیڈول جاری

طلبا و طالبات کیلئے اہم خبر،پنجاب بھر کے تعلیمی بورڈز نے امتحانات کا شیڈول جاری کر دیا۔
تفصیلات کے مطابق پنجاب بھر میں نویں، دسویں، گیارہویں اور بارہویں کے امتحانات کا شیڈول جاری کر دیا گیا ہےاور پنجاب بورڈز کمیٹی آف چیئرمین نے امتحانات اور نتائج کے شیڈول کی منظوری دیدی ہے۔
شیڈول کے مطابق پنجاب بورڈز کے مطابق نویں اور دسویں کے سالانہ امتحانات 27 مارچ سے شروع ہوں گے، دسویں جماعت (پارٹ ٹو) کا نتیجہ 6 اگست کو متوقع ہے ،جبکہ نویں جماعت (پارٹ ون) کا نتیجہ 2 ستمبر کو جاری ہونے کا امکان ہے۔
پنجاب بورڈز کمیٹی کے مطابق نویں اور دسویں جماعت کے سپلیمنٹری امتحانات 6 اکتوبر سے شروع ہوں گے۔
پنجاب بورڈز کا کہنا ہے کہ گیارہویں اور بارہویں جماعت کے سالانہ امتحانات 20 مئی سے شروع ہوں گے۔بارہویں جماعت کا نتیجہ 23 ستمبر کو متوقع ہے، گیارہویں جماعت کا نتیجہ 22 اکتوبر کو جاری کیے جانے کا امکان ہے۔
پنجاب بورڈز کمیٹی کے مطابق انٹرمیڈیٹ سپلیمنٹری امتحانات 3 نومبر 2026 سے شروع ہوں گے، سپلیمنٹری امتحانات کے نتائج 12 جنوری 2027 کو متوقع ہیں۔یہ شیڈول پنجاب کے تمام تعلیمی بورڈز پر لاگو ہوگا، امتحانات کے انعقاد کیلئے تمام تر انتظامات مقررہ وقت کے مطابق مکمل کیے جائیں گے۔