فتنہ و فساد اور جلاؤ گھیراؤ کے ماحول میں کوئی قوم ترقی نہیں کر سکتی،نوازشریف

صدرمسلم لیگ(ن) میاں محمدنوازشریف نےکہاہےکہ فتنہ و فساد اور جلاؤ گھیراؤ کے ماحول میں کوئی قوم ترقی نہیں کر سکتی۔ مسلم لیگ ن نے ہمیشہ ملکی ترقی کے منصوبے شروع کیے۔
لاہور میں ضمنی انتخابات میں کامیاب ہونے والے نومنتخب اراکینِ اسمبلی سے خطاب کرتے ہوئے نواز شریف نے کہا کہ میں تمام منتخب ہونے والے نمائندگان کو مبارکباد پیش کرتا ہوں۔ اللہ کے فضل سے جھوٹ، گالم گلوچ، بدتمیزی، بدتہذیبی اور فتنہ اپنے انجام کو پہنچا۔
نواز شریف کا کہنا تھا کہ عوام نے کارکردگی کی بنیاد پر ہمیں ووٹ دیا ہے۔ جنہوں نے الیکشن کا بائیکاٹ کیا تھا، وہ بعد میں خود میدان میں اترے اور شکست کھا گئے۔
مسلم لیگ ن کے صدر نے سابق حکومت پر تنقید کرتے ہوئے کہا کہ گزشتہ دور میں ایک بھی ترقیاتی منصوبہ شروع نہیں ہوا، ملک میں صرف تباہی پھیلائی گئی، بدتہذیبی کا کلچر پروان چڑھایا گیا، خارجہ پالیسی کو نقصان پہنچایا گیا اور میرٹ کی دھجیاں اڑائی گئیں۔ ملک دیوالیہ ہونے کے قریب پہنچ گیا تھا۔ اگر ترقی کا سفر اسی رفتار سے جاری رہتا تو آج دنیا میں ہمارا الگ مقام ہوتا۔
انہوں نے کہا کہ مسلم لیگ ن نے ہمیشہ ملکی ترقی کے منصوبے شروع کیے۔ آج ملک میں میرٹ کو ترجیح دی جا رہی ہے اور ہر محکمے میں محنت سے کام ہو رہا ہے۔ حکومت کے اقدامات کی بدولت مہنگائی میں کمی آئی ہے اور پاکستان کو ڈیفالٹ سے بچایا گیا ہے۔ پنجاب اور وفاقی حکومت مسلسل محنت کر رہی ہیں۔
سابق وزیرِاعظم کا کہنا تھا کہ ہم اب تمام شعبوں کی بحالی کی کوشش کر رہے ہیں۔ گزشتہ ڈیڑھ برس میں عوامی خدمت کا نیا ریکارڈ قائم کیا گیا ہے اور ہم نے پاکستان کو اخلاقی اور معاشرتی زوال سے بھی بچایا ہے۔
نواز شریف نے کہا کہ  جو دوسروں کو چور اور ڈاکو کہتے تھے، وہ خود چور ثابت ہوئے۔ فتنہ و فساد اور جلاؤ گھیراؤ کے ماحول میں کوئی قوم ترقی نہیں کر سکتی۔