ایران امریکاکشیدگی،پاکستان کافلائٹ آپریشن معطل

ایران اور امریکا کے درمیان بڑھتی ہوئی فوجی کشیدگی اور جنگی صورتحال کے باعث پاکستان کا فضائی آپریشن شدید متاثر ہوا ہے۔
پاکستان سے مشرقِ وسطیٰ کے لیے فلائٹ آپریشن آج پانچویں روز بھی معطل رہا۔
پاکستان انٹرنیشنل ایئرلائنز (PIA) نے مشرقِ وسطیٰ اور خلیجی ممالک کے لیے اپنا آپریشن عارضی طور پر بند کر دیا ہے۔
گزشتہ تین سے پانچ دنوں میں ملکی و غیر ملکی ایئرلائنز کی 500 سے زائد پروازیں منسوخ ہو چکی ہیں، جس سے ہزاروں مسافر ایئرپورٹس پر پھنس گئے ہیں۔
یورپی اور امریکی ممالک جانے والی پروازیں ایران کی فضائی حدود کے بجائے متبادل اور طویل راستے استعمال کرنے پر مجبور ہیں، جس سے سفر کے دورانیے اور کرایوں میں اضافے کا خدشہ ہے۔
مسافر پروازوں کے ساتھ ساتھ ایئر کارگو سروس بھی معطل ہے، جس سے اربوں روپے کے مالی نقصان کا تخمینہ لگایا گیا ہے۔
کشیدگی کے پیشِ نظر اسلام آباد، لاہور اور کراچی میں امریکی ویزا سروسز بھی عارضی طور پر بند کر دی گئی ہیں۔