لاہور: ڈبل ڈیکر بس سروس، آمدن اور سیاحوں میں نمایاں اضافہ ریکارڈ

ٹورازم ڈویلپمنٹ کارپوریشن آف پنجاب (ٹی ڈی سی پی) کے زیرانتظام سیاحت لاہور ڈبل ڈیکر بس سروس کی رواں سال کے دوران آمدن اور سیاحوں کی تعداد میں نمایاں اضافہ ریکارڈ کیا گیا ۔
سرکاری اعداد و شمار کے مطابق 2025 میں ڈبل ڈیکر بس سروس کی مجموعی آمدن میں تقریباً 20 فیصد اضافہ ہوا، جس کے بعد سروس نے تقریباً 3 کروڑ روپے کی آمدن حاصل کی۔اسی عرصے میں مجموعی طور پر 40 ہزار سیاحوں نے اس سہولت سے استفادہ کیا، جو گزشتہ برس کے مقابلے میں تقریباً 20 فیصد اضافے کی نشاندہی کرتا ہے۔
ٹی ڈی سی پی کے مطابق یہ اضافہ حکومتِ پنجاب کی سیاحتی پالیسی، موثر انتظامی اقدامات کا نتیجہ ہے۔ڈبل ڈیکر بس سروس کے ذریعے لاہور کے تاریخی، ثقافتی اور ورثہ جاتی مقامات کو مقامی اور غیر ملکی سیاحوں کیلئے منظم انداز میں متعارف کروایا جا رہا ہے، یہ سروس حکومتِ پنجاب کے میگنیفیسنٹ پنجاب وژن کے تحت سیاحت کے فروغ میں معاون ثابت ہو رہی ہے۔ بس سروس کے ذریعے شہریوں اور سیاحوں کو لاہور کے اہم مقامات تک محفوظ اور سہل رسائی فراہم کی جا رہی ہے۔
ٹی ڈی سی پی کے مطابق آئندہ سال2026 میں بھی حکومتِ پنجاب کی رہنمائی میں سیاحتی سہولیات میں بہتری، نئے روٹس کے اجرا اور جدید اقدامات پر کام جاری رکھا جائے گا، تاکہ لاہور اور پنجاب کو قومی اور بین الاقوامی سطح پر ایک نمایاں سیاحتی منزل کے طور پر فروغ دیا جا سکے۔