میئر نیویارک پاکستانی خاتون سے ملکر آبدیدہ، لاہور کی خوبصورتی کی تعریف کی

نیویارک کے نومنتخب میئر ظہران ممدانی شہریوں سے ملاقات کے دوران ایک پاکستانی خاتون سے مل کر آبدیدہ ہوگئے۔
نیویارک کے میئر ظہران ممدانی نے عہدہ سنبھالنے کےبعد 142 شہریوں سے ملاقات کی اور ان کے مسائل سننے کے علاوہ شہر کی بہتری کیلئے تجاویز طلب کیں ۔اس دوران ایک پاکستانی خاتون نے بھی ان سے ملاقات کی، ثمینہ نامی خاتون نے ظہران ممدانی کو مبارک باد دیتے ہوئے بتایا کہ ان کا تعلق پاکستان سے ہے، انہوں نے ظہران ممدانی سے پوچھا کہ کیا انہیں اردو آتی ہے جس پر ظہران ممدانی نے کہا کہ وہ اردو پڑھ تو نہیں سکتے لیکن بول سکتے ہیں۔
ظہران ممدانی نے خاتون سے پوچھا پاکستان میں ان کا تعلق کہاں سے جس پر خاتون نے کہا کہ ان کا تعلق لاہور سے ہے۔ یہ سن کر ظہران ممدانی نے کہا کہ لاہور بہت خوبصورت شہر ہے اور وہ بھی ایک مرتبہ لاہور جاچکے ہیں۔خاتون نے ظہران ممدانی سے کہا کہ نیویارک بہت خوبصورت شہرہے، یہاں کی عمارتیں بہت خوبصورت ہیں لیکن آپ نے آکر لوگوں کے دل بدل دیئے ہیں، آپ کی آنکھوں میں جو سچائی ہے وہ کسی سے چھپ نہیں سکتی ،خاتون کی یہ بات سن کر ظہران ممدانی آبدیدہ ہوگئے۔