پنجاب کےماڈل کورٹس کی ماہانہ کارکردگی رپورٹ کے اعدادوشمار جاری

پنجاب بھرکے ماڈل کورٹس کی ماہانہ کارکردگی رپورٹ کے اعدادوشمار جاری کر دیئے گئے۔
چیف جسٹس لاہور ہائی کورٹ مس عالیہ نیلم کی ہدایات پر پنجاب بھر میں قائم ماڈل کورٹس کے قیام کے ثمرات آناشروع ہوگئے،پنجاب کی ماڈل کورٹس نے ایک مہینے میں 12 ہزار سے زائد مقدمات نمٹا دیے۔
اعدادوشمارکےمطابق صوبہ بھر کی ماڈل کورٹس نے اکتوبر کے مہینے میں 12,275 مقدمات کے فیصلے کئے، فوجداری ماڈل کورٹس نے گزشتہ ماہ 1072 مقدمات کے فیصلے کئے ،فوجداری ماڈل کورٹس نے قتل کے 115 اور منشیات سے متعلق 376 مقدمات کے فیصلے کئے،ایڈیشنل ڈسٹرکٹ ججز کی ایپلیٹ ماڈل کورٹس نے 292 سول و فیملی اپیلوں، نگرانی اور دیگر مقدمات کے فیصلے کئے ۔
اعدادوشمارکےمطابق ماڈل سول اور مجسٹیریل(Magisterial) کورٹس نے مجموعی طور پر 10,911 مقدمات نمٹائے،ماڈل سول کورٹس نے ایک ماہ میں 2,162مقدمات کا فیصلہ کیا،ماڈل مجسٹریٹ کورٹس نے کل 8,749 مقدمات کے فیصلے کئے ہیں ۔
ماڈل کورٹس کی کارکردگی لاہور ہائی کورٹ کی جامع عدالتی اصلاحات اور جدید کیس مینجمنٹ سسٹم اور مؤثر مانیٹرنگ کا براہ راست نتیجہ ہے ،ماڈل کورٹس کی کارکردگی کی بدولت زیر التواء مقدمات کی تعداد میں کمی آئی ہے،تیز اور معیاری انصاف کی وجہ سے وکلاء اور سائلین کا نظامِ انصاف پر اعتماد مزید مستحکم ہواہے۔
ماڈل عدالتوں نے لاہور ہائی کورٹ کی جانب سے جاری ٹائم لائنز کی سختی سے پیروی کی۔
چیف جسٹس لاہور ہائی کورٹ مس عالیہ نیلم نے صوبے بھر میں ماڈل کورٹس کی کارکردگی کو سراہا اورکہاکہ فوری اور معیاری انصاف عدلیہ کی اولین ترجیح ہے، عدالتی نظام کو جدید خطوط پر استوار کرنے کا عمل اسی تسلسل کے ساتھ جاری رہے گا۔