ایپل کیلئے نیا چیلنج:گوگل جیمنی میں پرسنل انٹیلی جنس فیچر متعارف

ایپل کیلئے نیا چیلنج،گوگل جیمنی میں پرسنل انٹیلی جنس فیچر متعارف،طویل عرصے سے ڈیجیٹل منصوبہ بندی صارفین کیلئے ایک مشکل کام بنا ہوا تھا، کیونکہ مختلف کام انجام دینے کیلئے انہیں بار بار الگ الگ ایپس استعمال کرنی پڑتی تھیں، تاہم اب گوگل نے اس مسئلے کے حل کیلئے ایک نئی اپڈیٹ متعارف کروا دی ہے۔
الفابیٹ کی ذیلی کمپنی گوگل نے حال ہی میں اپنے جیمنی پلیٹ فارم میں پرسنل انٹیلیجنس فیچر لانچ کیا ہے، جس کا مقصد صارفین کو روزمرہ کے کام منظم کرنے اور مختلف گوگل ایپس سے معلومات اکٹھی کرنے میں مدد فراہم کرنا ہے۔دیگر مصنوعی ذہانت یا اے آئی ٹولز کے برعکس ،جو صرف انٹرنیٹ ڈیٹا تک محدود ہوتے ہیں پرسنل انٹیلیجنس صارف کی ذاتی دنیا کو بہتر انداز میں سمجھنے کی صلاحیت رکھتا ہے۔
یہ فیچر جی میل، گوگل فوٹوز اور یوٹیوب جیسی ان ایپس کا تجزیہ کرتا ہے، جنہیں صارف سب سے زیادہ استعمال کرتا ہے، تاکہ ایک ذاتی نوعیت کا معاون (پرسنل اسسٹنٹ) بن سکے۔گوگل لیبز اور جیمنی ایپ کے مطابق چاہے وہ آپ کی ای میلز کے کسی تھریڈ کو دیکھی گئی ویڈیو سے جوڑنا ہو یا فوٹو لائبریری میں موجود باریکیوں کو سمجھنا اب جیمنی بغیر یہ بتائے کہ کہاں دیکھنا ہے خود سیاق و سباق کو سمجھ لیتی ہے۔یوں یہ فیچر صارفین کیلئے کئی کام آسان بنا دے گا۔
اس کے ساتھ گوگل کے مطابق پرسنل انٹیلیجنس کو پرائیویسی کو اولین ترجیح دیتے ہوئے ڈیزائن کیا گیا ہے۔ یہ فیچر مکمل طور پر اختیاری ہے اور صارفین کو اس پر مکمل کنٹرول حاصل ہوگا۔ وہ اپنی مرضی سے ایپس کو لنک کر سکیں گے اور انہیں کسی بھی وقت چیٹ ہسٹری ڈیلیٹ کرنے کا اختیار بھی ہو گا۔