پاکستان ریلویز کا مختلف ٹرینوں میں کیمرے لگانے کا اعلان

ریل کے مسافروں کیلئےاہم خبر،پاکستان ریلویز نے مختلف ٹرینوں میں کیمرے لگانے کا اعلان کردیا۔
وفاقی وزیر ریلوے حنیف عباسی نے پاکستان ریلویز کی 2025 کی کارکردگی جاری کرتے کہا ہےکہ پاکستان ریلویز نے 2025 میں 93 ارب روپے سے زائد ریونیو حاصل کیا، مالی سال 2025-26 کی پہلی ششماہی میں 50 ارب روپے کی آمدن متوقع ہے، جبکہ رواں سال کے اختتام پر ریلوے تاریخ میں پہلی بار ایک کھرب آمدن کاسنگِ میل عبور کرلے گا۔
حنیف عباسی کا مزید کہنا تھاکہ راولپنڈی کو ملک کا پہلا سمارٹ اسٹیشن بنا دیا ہے،کیمرے اور سکیورٹی سسٹم نصب ہے، 2026 میں دیگر بڑے سٹیشنز بھی سمارٹ بننے جا رہے ہیں،مختلف ٹرینوں میں بھی کیمرے لگانے کا فیصلہ کر لیا گیا ہے، لاہور، کراچی، راولپنڈی اورفیصل آباد سٹیشن اپ گریڈ کیے گئے، ریلوے کو ڈیجیٹائز کر دیا ہے، وزارت کا تمام کام ای فائلنگ پر منتقل کر دیا ہے، اب تمام بڑے سٹیشنوں پر اے ٹی ایم، ڈی وی ایم اور پی او ایس مشینیں موجود ہیں۔
ریلوے نے صرف 8 ماہ میں ٹرینوں کے 8 ریکس کو اپ گریڈ کیا، شالیمار، پاک بزنس، لاثانی، فیض احمد فیض ٹرینوں کو اپ گریڈ کیا گیا، دسمبر 2026 تک پاکستان ریلویز کی تمام ٹرینیں اپ گریڈ کر دیں گے۔