امن کیلئے پاکستان کی کوششیں قابلِ ستائش ہیں، مسعود پزشکیان

ایرانی صدر مسعود پزشکیان نے خطے میں امن کے قیام کے لیے پاکستان کے کردار کو سراہتے ہوئے کہا ہے کہ پاکستان کی مسلسل اور مخلصانہ کوششیں اس کے مثبت اصولوں اور امن پسند پالیسیوں کی عکاسی کرتی ہیں۔

اپنے بیان میں ایرانی صدر نے کہا کہ پاکستان نے کشیدگی کم کرنے اور امن کے فروغ کے لیے اہم کردار ادا کیا، جس پر ایرانی قیادت اور عوام پاکستان کے شکر گزار ہیں۔ انہوں نے کہا کہ اسی جذبے کے تحت وہ پاکستان کے دورے پر آئے تاکہ پاکستانی قیادت کا شکریہ ادا کیا جا سکے۔

مسعود پزشکیان کا کہنا تھا کہ دورۂ پاکستان کے دوران ان کی صدر مملکت آصف علی زرداری، وزیراعظم شہباز شریف اور فیلڈ مارشل عاصم منیر سے تفصیلی ملاقاتیں ہوئیں، جن میں دوطرفہ تعلقات، علاقائی صورتحال اور مختلف شعبوں میں تعاون کے فروغ پر تبادلۂ خیال کیا گیا۔

انہوں نے اس امید کا اظہار کیا کہ پاکستان اور ایران کے درمیان موجود برادرانہ تعلقات مستقبل میں مزید مضبوط ہوں گے اور دونوں ممالک باہمی تعاون کے نئے مواقع سے فائدہ اٹھائیں گے۔