پی آئی اےکی یورپ فلائٹ پربڑی آفر: فضائی مسافر پرواز کے ٹکٹ پر ٹرین کا سفر بھی کر سکیں گے

پاکستان انٹرنیشنل ایئرلائن (پی آئی اے) کے برطانیہ اور کینیڈا جانیوالے مسافر اب ایک ہی ٹکٹ میں پرواز اور ٹرین سروس استعمال کرسکیں گے۔
ترجمان پی آئی اے کے مطابق پی آئی اے کا کینیڈا اور برطانیہ کی ریل سروسز کے ساتھ تاریخی معاہدہ طے پاگیا ۔ معاہدے کے تحت پی آئی اے میں سفر کرنیوالے مسافروں کو اسی ٹکٹ پر ٹورنٹو، مانچسٹر اور لندن میں ٹرین کے سفر کی سہولت فراہم ہو گی۔
ترجمان قومی ایئرلائن کے مطابق پی آئی اے کی پرواز سےٹورنٹو پہنچنے والے مسافر ایسیس ریل سروس کے ذریعے کینیڈا کے آٹھ اہم شہروں تک سفر کر سکیں گے،اسی طرح برطانیہ کے شہر مانچسٹر اور لندن کیلئے سفر کرنیوالے پی آئی اے کے مسافروں کو پچاس سے زائد شہروں تک ایسیس ریل سروس کے ذریعے رسائی حاصل ہوگی۔
پی آئی اے کے مطابق مسافر ریل سروس کا ٹکٹ ایئرلائن کے تمام بکنگ دفاتر اور رجسٹرڈ ٹریول ایجنٹس سے حاصل کر سکتے ہیں،ٹکٹس کی بکنگ پی آئی اے کی ویب سائٹ اور موبائل ایپلی کیشن سے بھی کی جا سکتی ہے۔معاہدے کا بنیادی مقصد مسافروں کو ان کے گھر کی دہلیز تک بہترین سفری سہولت فراہم کرنا ہے۔ ایئر ٹو رل اشتراک پی آئی اے کے نیٹ ورک کو ڈیجیٹل اور جدید خطوط پر استوار کرنے کی جانب ایک بڑا قدم ہے۔
واضح رہے کہ ایسیس ریل ایک بین الاقوامی کمپنی ہے، جو ایئر لائنز اور ریلوے کے درمیان پُل کا کام کرتی ہے۔