سعودی عرب:نئی قومی فضائی کمپنی ریاض ایئر نے اہم سنگ میل عبور کرلیا

فضائی سفر و سیاحت میں اہم پیشرفت ،سعودی عرب کی ریاض ایئر نے اہم سنگ میل عبور کرلیا۔
مملکت کی نئی قومی فضائی کمپنی ریاض ایئر نے ریاض کے کنگ خالد ایئرپورٹ سے لندن کے ہیتھرو ایئرپورٹ تک پہلی مسافر پرواز کامیابی سےبھرنے کا اعزاز حاصل کر لیا۔
رپورٹ کے مطابق لندن کیلئے بوئنگ 9-787 ڈریم لائنز کی پرواز روزانہ کی بنیاد پر چلائی جائے گی، فی الحال یہ ریاض ایئر کے ملازمین اور منتخب مہمانوں تک محدود ہے۔
ذرائع کے مطابق ریاض ایئر کی پہلی انٹرنیشنل پروازآر ایکس 401 کنگ خالد انٹرنیشنل ایئرپورٹ سے دو روز قبل اتوار کی صبح کے سوا تین بجے روانہ ہوئی، جو لندن کے ہیتھرو ایئرپورٹ پر 7 بج کر 30 منٹ پر لینڈ کرگئی، جبکہ واپسی پر آرایکس 402لندن سے 9 بج کر 30 منٹ پر ٹیک آف کیا اور ریاض کے وقت کے مطابق کنگ خالد انٹرنیشنل ایئرپورٹ پر 19:15 پر لینڈ کیا۔
رپورٹ کے مطابق امکان ہے کہ ریاض ایئر مملکت کی نان آئل جی ڈی پی میں 20 ارب ڈالر سے زیادہ کا اضافہ کرے گی اور دو لاکھ سے زیادہ براہ راست اور بالواسطہ ملازمتوں کے مواقع ملیں گے، جبکہ 2030 تک دنیا کے 100 مقامات تک فضائی کمپنی ریاض ایئر اپنا دائرہ وسیع کرے گی۔
رپورٹ کے مطابق فلائٹ آپریشن کے دوسرے مرحلے کا آغاز دبئی کیلئے کیا جائے گا۔ائیرلائن کا کہنا ہے کہ لائیلٹی پروگرام ’’سفیر‘‘ کے نام سے شروع کیا گیا ہے، ابتدائی رجسٹریشن کرانے والے ممبران کو بکنگ کی سہولت و دیگر مراعات حاصل ہوں گی۔