مضبوط اور عوام دوست پولیس داخلی سلامتی کی ضامن ہے، فیلڈ مارشل

چیف آف ڈیفنس فورسز و فیلڈ مارشل سید عاصم منیر نےکہاہےکہ مضبوط، پیشہ ور اور عوام دوست پولیس فورس داخلی سلامتی کی ضامن ہے۔

آئی ایس پی آر کے مطابق نیشنل پولیس اکیڈمی آمد پر کمانڈنٹ نیشنل پولیس اکیڈمی نے فیلڈ مارشل سید عاصم منیر کا استقبال کیا، جبکہ پولیس کے چاق و چوبند دستے نے گارڈ آف آنر پیش کیا۔
چیف آف ڈیفنس فورسز سیدعاصم منیرنے پولیس شہداء یادگار پر پھولوں کی چادر چڑھائی، فاتحہ خوانی کی اور پولیس کے شہداء کو خراجِ عقیدت پیش کیا۔
فیلڈ مارشل نے امن کے قیام، قانون کی بالادستی اور عوامی تحفظ کے لیے جانوں کا نذرانہ پیش کرنے والے پولیس اہلکاروں کی عظیم قربانیوں کو سراہا اور دہشت گردی، جرائم اور داخلی سلامتی کے چیلنجز کے مقابلے میں پولیس کے کردار اور قربانیوں کا اعتراف کیا۔
دورے کے دوران فیلڈ مارشل کو سکول فار ہائی امپیکٹ ایلیٹ لا انفورسمنٹ ڈویلپمنٹ (شیلڈ) سمیت پولیس کی تربیت، استعداد کار میں اضافے اور جدید کاری کے پروگرامز پر بریفنگ دی گئی۔
فیلڈ مارشل سید عاصم منیر نے کیڈٹ اسسٹنٹ سپرنٹنڈنٹس آف پولیس سے ملاقات کی اور پولیس کو شہریوں کی جان، مال اور عزت کے تحفظ میں پہلی دفاعی لائن قرار دیا۔
انہوں نے بین الادارہ تعاون، جدید پولیسنگ اور عوامی اعتماد کے فروغ پر زور دیتے ہوئے کہا کہ مضبوط، پیشہ ور اور عوام دوست پولیس فورس داخلی سلامتی اور قانون کی حکمرانی کے لیے ناگزیر ہے۔
فیلڈ مارشل کا کہنا تھا کہ قانون نافذ کرنا پولیس کی مقدس ذمہ داری ہے اور پاک فوج ہمیشہ پاکستان کی بہادر اور قابلِ فخر پولیس کے شانہ بشانہ کھڑی رہے گی۔
اس موقع پر سینئر پولیس قیادت نے پولیسنگ کے معیار کو بہتر بنانے، پیشہ ورانہ صلاحیتوں میں اضافے اور ادارہ جاتی اصلاحات کے عزم کا اعادہ کیا۔