ٹیکنالوجی کانیا کارنامہ:مارشل آرٹ میں مہارت رکھنے والا روبوٹ ایجاد

ٹی 800 نامی روبوٹ انسان سے حد درجہ مماثلت رکھتا ہے، جبکہ اس شاہکار روبوٹ کو انجن اے آئی کمپنی نے بنایا ہے۔
سائنسدانوں نے ایک ایسا روبوٹ تیار کیا ہے جو انسانوں کی طرح کنگ فو میں مہارت رکھتا ہے۔اسےچین کے شہر شینژن میں قائم انجن اے آئی ایک روبوٹکس کمپنی نے بنایا ہے، جو ہیومنائزڈ روبوٹ بنانے میں مہارت رکھتی ہے۔یہ روبوٹ ہالی وڈ کی مشہور فلمز دی ٹرمینیٹراور سکائی نیٹ کی یاد دلاتا ہے کیونکہ یہ بلکل ان میں دکھائے جانے والے روبوٹ جیسا ہی ہے، اور دیگر بنائے جانے والے روبوٹ کے مقابلے نہایت پھرتیلا اور طاقتور ہے، یہ مارشل آرٹ کرتے ہوئے ہوبہو انسانی نقل کرتا ہے، بلکہ انسانوں کے ساتھ مقابلہ بھی کر سکتا ہے۔
اس کی اونچائی 1.73 میٹر جبکہ بیٹری سمیت وزن 75 کلوگرام ہے، جبکہ اس کا جسم خاص ہلکے مگر مضبوط میگنیشیم اور ایلومینیم کے مرکب سے بنایا گیا ہے، اس کے ہاتھ پاؤں بہت آسانی سے حرکت کرتے ہیں، اسی لیے یہ تیز اور طاقتور نظر آتا ہے۔یہ روبوٹ چار گھنٹے تک مسلسل کام کر سکتا ہے۔اس میں ایسے سینسر لگے ہیں جو اسے اپنے اردگرد کی چیزیں فوراً سمجھنے میں مدد دیتے ہیں، تاکہ یہ ٹکرائے بغیر چل سکے۔
اس روبوٹ کی سب سے خاص بات یہ ہے کہ یہ 29 مختلف زایوں میں حرکت کرسکتا ہے، اس میں موجود جوڑ 450 نیوٹن میٹر ٹارک پیدا کرتے ہیں، جس کی وجہ سے اس کی حرکت بعض انسانی کھلاڑیوں سے بھی بہتر سمجھی جا رہی ہے۔یہ روبوٹ 5 کلوگرام تک وزن اٹھا سکتا ہے، اس کے ٹانگوں کے جوڑوں میں خاص کولنگ سسٹم لگا ہے، جس سے یہ زیادہ دیر تک بھاری کام کر سکتا ہے اور گرم نہیں ہوتا، جبکہ ماڈیولر سالڈ سٹیٹ بیٹری چار گھنٹے تک سخت کام کرنے کے قابل بناتی ہے، بیٹری آسانی سے بدلی جا سکتی ہے اور مستقبل میں اپ گریڈ بھی ہو سکتی ہے۔