فوج پرتنقید ہم نے بھی کی مگرکبھی سرخ لکیرعبور نہیں کی، خواجہ آصف

وفاقی وزیردفاع خواجہ آصف نے کہا ہے کہ  فوج پرتنقید ہم نے بھی کی مگرکبھی سرخ لکیرعبور نہیں کی، تحریک انصاف دہشت گردی کے خلاف جنگ کی کھلی مخالفت کرتی ہے۔
وزیردفاع خواجہ آصف کااپنےایک بیان میں کہناتھاکہ پچھلے چار پانچ سال میں حالات خراب ہونے کی ذمہ داری عمران خان پر ہے، بانی پی ٹی آئی کے حوالے سے نیوزکانفرنس میں فطری اورقدرتی ردعمل دیا گیا ہے۔عمران خان کی ہمشیرہ کی بھارتی میڈیا سے گفتگو فیصلہ کن مرحلہ ثابت ہوئی، بھارت کے ساتھ کشیدہ ماحول میں انہوں نے جان بوجھ کرانٹرویو دیا۔
خواجہ آصف کامزیدکہناتھاکہ جوکچھ سوشل میڈیا پرہورہا ہے کیا کبھی پی ٹی آئی نے اس کی مذمت کی ہے؟ سوشل میڈیا پرسب کچھ پی ٹی آئی کی مرضی سے ہورہا ہے۔ اگر پی ٹی آئی والے دہشتگردی کے خلاف جنگ نہیں لڑ سکتے، اس جنگ کو اپنا نہیں سکتے، شہیدوں کے جنازے نہیں پڑھ سکتے، اور اس کے بجائے ہندوستانی میڈیا کو پاکستان کے خلاف انٹرویو دیتے ہیں تو پھر یہی زبان سنیں گے جو سنی ہے۔

اُن کاکہناتھاکہ فوج پرتنقید ہم نے بھی کی لیکن کبھی سرخ لکیرعبور نہیں کی، تحریک انصاف دہشت گردی کے خلاف جنگ کی کھلی مخالفت کرتی ہے۔ بیرسٹرگوہرکو کوئی لفٹ نہیں کراتا، ان کی پارٹی کے ورکرز ان کے خلاف بیان دیتے ہیں، چیئرمین پی ٹی آئی کیا بات کریں گے جب ان کی اپنی پارٹی مخالفانہ بیانات دے رہی ہے، وزیراعلیٰ خیبرپختونخوا دہشتگردی کے خلاف جنگ نہیں لڑرہے۔