آج 21 مارچ کو دنیا میں دن اور رات کا دورانیہ برابر ہو جائے گا

سال کا وہ موقع جب دن اور رات کا دورانیہ یکساں ہو جائے گا۔آج 21 مارچ کو دنیا میں دن اور رات کا دورانیہ برابر ہو جائے گا۔آج دن اور رات کا دورانیہ 12،12 گھنٹوں پر محیط ہو گا۔
اس کے بعد راتوں کا دورانیہ کم اور دن کا دورانیہ بڑھنے لگے گا، جبکہ زمین کے جنوبی نصف کرے میں اس سے الٹ ہوگا، یعنی وہاں اب دن کا دورانیہ گھٹنے ،جبکہ رات کا بڑھنے لگے گا۔ہر سال مارچ کے دوسرے عشرے کے اختتام پر عیسوی کیلنڈر کے مطابق شمالی نصف کرے میں موسم بہارجبکہ جنوبی نصف کرے میں خزاں کا آغاز ہوتا ہے۔
یوں تو حالیہ برسوں میں موسم بہار کا دورانیہ گھٹ گیا ہے، مگر پھر بھی ہر سال 19 سے 21 مارچ کے درمیان اعتدال ربیعی کا آغاز ہوتا ہے۔یہ وہ موقع ہوتا ہے، جب سورج شمال کی طرف جاتے ہوئے خط استوا کے اوپر سے گزرتا ہے۔ہماری زمین سورج کے گرد گھومتے ہوئے مدار میں ایک جانب جھکتی ہے، جس کے نتیجے میں سال میں کچھ مواقعوں پر سورج کی روشنی اور حرارت زیادہ یا کم مقدار میں براہ راست ہمارے سیارے تک پہنچتی ہے۔
اعتدال ربیعی کے موقع پر چونکہ سورج خط استوا کے اوپر ہوتا ہے، لہٰذا دنیا میں لگ بھگ ہر جگہ سورج کی روشنی یکساں مقدار میں پہنچتی ہے،یعنی اس موقع پر دن اور رات کی لمبائی بھی لگ بھگ یکساں ہوتی ہے۔دن اور رات کی لمبائی کا یہ سلسلہ اعتدال ربیعی کے بعد بھی چند دن تک برقرار رہتا ہے۔
ماہرین کے مطابق آج کے دن سورج اپنا سفر طے کرتے ہوئے اس نقطہ آغاز پر پہنچے گا، جہاں اس نے پہلے روز اپنے سفر کا آغاز کیا تھا۔
یہی وجہ ہے کہ21 مارچ کو نئے شمسی سال کا آغازسمجھا جاتا ہے، اسی لیے بعض ممالک میں نئے شمسی سال کے پہلے دن کو عید کے طور پر بھی منایا جاتا ہے۔