ابوظبی کا ماحول دوست مسجد رواں ماہ اکتوبر میں کھولنے کا اعلان

اللہ کے گھر کی نئی آن ، بان اور شان،ابوظبی نے ماحول دوست مسجد رواں ماہ اکتوبر میں کھولنے کا اعلان کردیا۔
متحدہ عرب امارات میں ایک ایسی ماحول دوست مسجدزیر تعمیر ہے، جو کسی قسم کی کاربن ڈائی آکسائیڈ کا اخراج نہیں کرے گی۔یواے ای کی ریاست ابوظبی میں تعمیر کی جانیوالی یہ نیٹ زیرو انرجی مسجد دنیا بھر میں اپنی نوعیت کی پہلی ایسی مسجد ہوگی ،جو مٹی اور سولر پینلز سے تعمیر کی گئی ہے۔
برطانوی کمپنی اروپ کی ڈیزائن کردہ اس مسجد کو رواں ماہ اکتوبرمیں کھول دیا جائے گا، جس میں 1300 نمازیوں کی گنجائش ہوگی۔مسدار سٹی کی جانب سے تعمیر کردہ یہ مسجد اپنی توانائی کی 100 فیصد ضروریات سولر پینلز کی مدد سے پوری کرے گی۔اس مسجد میں ایسا کولنگ اور سرکولر ڈیزائن اپنایا گیا ہے ،جو توانائی کی ضروریات کو ایک تہائی، جبکہ پانی کی ضروریات کو 50 فیصد تک کم استعمال کرے گا۔
اس کے علاوہ سورج اور حرارت کے اثرات کو کم از کم رکھنے کیلئے مختلف طریقوں جیسے اینگل ونڈوز اور سکائی لائٹس، وال انسولیشن اور کولنگ میٹریلز وغیرہ کو آزمایا گیا ہے۔اس مسجد میں سینسرز کے ذریعے درجہ حرارت اور نمی کو مانیٹر کرکے پنکھوں اور ائیر کنڈیشنرز کو اسی وقت آن کیا جائے گا، جب ضروری ہوگا۔