انٹرنیٹ کی کیبل میں فالٹ تاحال برقرار، ٹریفک متبادل روٹس پر منتقل

انٹرنیٹ کی کیبل میں فالٹ تاحال برقرار، ٹریفک کو متبادل روٹس پر منتقل کرکےچلایاجارہاہے۔قومی اسمبلی کی قائمہ کمیٹی میں جواب جمع کرادیاگیا۔
قومی اسمبلی کی قائمہ کمیٹی برائے انفارمیشن ٹیکنالوجی و ٹیلی کام کے اجلاس میں سیکرٹری آئی ٹی نے بتایا کہ انٹرنیٹ کی زیرِ سمندر کیبل میں فالٹ تاحال مکمل طور پر دور نہیں کیا جا سکا، تاہم کنسورشیم کی جانب سے مرمتی کام جاری ہے۔
انہوں نے کہا کہ پاکستان کی انٹرنیٹ ٹریفک کو عارضی طور پر متبادل روٹس پر منتقل کر دیا گیا ہے۔
اجلاس کے دوران ملک بھر میں موبائل سگنلز کی ناقص صورتحال کا معاملہ بھی زیرِ بحث آیا، جس پر کمیٹی نے پی ٹی اے حکام کو آئندہ اجلاس میں طلب کر لیا۔اجلاس میں اسلام آباد آئی ٹی پارک کے منصوبے پر بھی تفصیلی بریفنگ دی گئی۔
پروجیکٹ ڈائریکٹر نے بتایا کہ منصوبے پر 80 فیصد کام مکمل ہو چکا ہے۔وفاقی وزیر برائے آئی ٹی شزہ فاطمہ نے کمیٹی کو آگاہ کیا کہ یہ منصوبہ کورین کمپنی کے تعاون سے مکمل کیا جا رہا ہے، تاہم تاخیر کے باعث وزیراعظم نے انکوائری کا حکم دے دیا ہے۔
شزہ فاطمہ نے مزید کہا کہ اسپیکٹرم کی قلت اور قانونی تنازعات کے باعث نیٹ ورک کو مشکلات کا سامنا ہے۔ انہوں نے بتایا کہ ملک اس وقت 274 میگا ہرٹز اسپیکٹرم پر چل رہا ہے جو ناکافی ہے، جبکہ حکومت رواں سال دسمبر یا آئندہ سال جنوری تک اسپیکٹرم آکشن کرانے کی کوشش کر رہی ہے۔