ایپل کے نئے آئی فون 17 کی پہلی ممکنہ جھلک سامنے آگئی

ایپل کے صارفین کیلئے خوشخبری، نئے آئی فون 17 کی پہلی ممکنہ جھلک سامنے آگئی۔آئی فون 17 سیریز کے حوالے سے لیکس کا سلسلہ جاری ہے ۔
2025 کے آئی فون کا ممکنہ ڈیزائن سامنے آگیا۔سوشل میڈیا پلیٹ فارم ایکس کی پوسٹ میں ایک پروٹوٹائپ ڈیزائن کو شیئر کرتے ہوئے عندیہ دیا گیاہے کہ آئی فون 17 سابقہ ماڈلز سے کافی مختلف ہوگا۔
ایکس پوسٹ میں بتایا گیا ہےکہ آئی فون 17 سیریز میں بیک پر سکوائر کیمرا سیٹ اپ کو ختم کر دیا جائے گا اور اس کی جگہ نیا ڈیزائن اپنایا جائے گا۔درحقیقت آئی فونز کا بیک کیمرا ڈیزائن کافی حد تک گوگل پکسل فونز کے پل (pill) کیمرا بار جیسا ہو جائے گا۔
اس سے قبل بلوم برگ کی ایک رپورٹ میں بتایا گیا تھا کہ آئی فون 17 سیرز میں فرنٹ کیمرے کے ڈائنا مک آئی لینڈ ڈیزائن کو بھی کسی حد تک تبدیل کیا جائے گا۔نئے آئی فونز میں ڈائنامک آئی لینڈ کے حجم کو کم کیا جائے گا،نیزیہ نیا فون ایپل کا اب تک کا سب سے پتلا آئی فون ہوگا۔
9 ٹو 5 میک کی ایک رپورٹ کے مطابق آئی فون 17 ائیر ایپل کے آئی فون پرو ماڈلز کے مقابلے میں 25 فیصد پتلا ہوگا۔
رپورٹ میں آئی فون 17 کی ایک کانسیپٹ تصویر بھی شیئر کی گئی ہے، جس سے اندازہ ہوتا ہے کہ یہ فون کتنا پتلا ہوسکتا ہے۔اس فون کے بیک پر ایک ہی کیمرا ہوگا، جو ممکنہ طور پر 48 میگا پکسل کا ہوگا۔درحقیقت اس فون کا ڈیزائن ہی اسے آئی فون کے صارفین کیلئے زیادہ پرکشش بنائے گا، ورنہ فیچرز کے لحاظ سے یہ سٹینڈرڈ ماڈل سے زیادہ خاص نہیں ہوگا۔