جو ملک، قوم، شہیدوں و غازیوں کیساتھ نہیں وہ دہشتگردوں کا ساتھی ہے،وزیراعظم

وزیراعظم شہبازشریف نےکہاہےکہ جو ملک، قوم، افواج پاکستان، شہیدوں و غازیوں کے ساتھ نہیں وہ دہشت گردوں کا ساتھی اور ان کا اتحادی ہے۔
قومی سلامتی کی پارلیمانی کمیٹی کے اجلاس سےخطاب کرتےہوئےوزیراعظم شہبازشریف کاکہناتھاکہ اس اہم نوعیت کےاجلاس سےحزب اختلاف کی عدم شرکت افسوسناک اور غیر سنجیدہ طرز عمل ہے۔ اپوزیشن کی اجلاس میں عدم شرکت قومی ذمے داریوں سے منہ موڑنے کے مترادف ہے جو قوم کی مقدس امانت ہیں۔ دہشت گردی کے خلاف سب کو متحد ہو کر آگے بڑنا ہے۔
اُن کامزیدکہناتھاکہ گزشتہ دو دہائیوں کے دوران دہشتگردی کی جنگ میں پاکستان کی معیشت کو 150 ارب ڈالر سے زیادہ کا نقصان ہوا۔ قربانیوں کی بدولت پاکستان کا امن بحال ہوا، معیشت سنبھلی اور ملک کی رونقیں بحال ہوئیں۔ 2018 میں قائم ہونے والی نا اہل حکومت نے دہشتگردی کے خلاف جنگ سے حاصل ہونے والے ثمرات کو ضائع کر دیا اور نیشنل ایکشن پلان پر عملدرآمد روک دیا۔
شہبازشریف کاکہناتھاکہ پوری قوم جو آج خمیازہ بھگت رہی ہے وہ اس پالیسی کا نتیجہ ہے۔ پاکستان آج فیصلہ کن موڑ پر کھڑا ہے۔دہشت گردی کو ایک مرتبہ پھر سے جڑ سے اکھاڑ پھینکنے کے لیے ہم سب کو آہنی عزم کا کا اعادہ کرنا ہوگا۔ دہشت گردوں کا اصل نشانہ عوام کا اتحاد ہے۔
اُن کامزیدکہناتھاکہ بینظیر بھٹو، بلور خاندان اور مفتی نعیمی سمیت سیکڑوں اہم شخصیات نےدہشت گردی کے خلاف جنگ میں لازوال قربانیوں دیں، دسمبر 2014 میں سانحہ آرمی پبلک سکول کے بعد میرے قائد نواز شریف نے پوری قوم کو متحد کیا۔ پوری قوم نے مل کر دہشت گردی کے ناسور کو جڑ سے اکھاڑ پھینکا۔ افواجِ پاکستان، قانون نافذ کرنے والے ادارے، سیکیورٹی ایجنسیز، سیاستدانوں اور پاکستانی شہریوں نے لازوال قربانیوں کی داستان رقم کی۔
وزیراعظم کامزیدکہناتھاحال ہی میں جعفر ایکسپریس پر دہشت گرد حملے کا افسوسناک واقعہ پیش آیا، فوجی جوانوں و افسران نے پیشہ ورانہ مہارت سے سیکڑوں جانیں بچائیں۔ وزیراعظم نے افواج پاکستان کی قیادت بالخصوص آرمی چیف جنرل سید عاصم منیر اور تمام قانون نافذ کرنے والے اداروں کو خراج تحسین پیش کیا۔

ان کاکہناتھاکہ  فوج اور عوام ایک ہیں، نہ ان کے مابین دراڑ ڈالنے کی سازش پہلے کامیاب ہوئی نہ آئندہ ہوگی ۔ ایسے شر پسند عناصر کی مذموم کوششیں کبھی کامیاب نہیں ہونے دیں گے۔ پاکستان کا حصول ہمارے اسلاف کی لاکھوں قربانیوں کے بعد ممکن ہوا۔ ہم ان کی قربانیوں کو کبھی رائیگاں نہیں جانے دیں گے۔ پاکستان ہے، تو ہم سب ہیں، ہماری سیاست ہے۔