ریلوے کا کراچی- لاہور کے درمیان جدید بزنس ٹرین چلانے کا اعلان

ریل کے مسافروں کیلئے  خوشخبری ،پاکستان  ریلویز  کا  کراچی اور لاہور کے درمیان ایک نئی اور جدید ترین بزنس ٹرین چلانے کا اعلان، جو رواں ہفتے19 جولائی کو اپنی باقاعدہ سروس کا آغاز کرے گی۔
یہ نئی سروس لاہور-کراچی جیسے مصروف ترین روٹ پر سفر کرنیوالے ریل کے مسافروں کیلئے ایک انقلابی قدم ثابت ہوگی، جو ان کے سفر کے تجربے کو نہایت آرام دہ اور معیاری بنانے کا ذریعہ ثابت ہو گی۔جدید سہولتوں سے مزین اس ٹرین میں 28 ڈیجیٹل طور پر لیس کوچز شامل ہوں گی، جنہیں مسافروں کی سہولت اور آسائش کو مدنظر رکھتے ہوئے ڈیزائن کیا گیا ہے۔
سفر کے دوران مفت وائی فائی کی سہولت دستیاب ہوگی ،جو بالخصوص کاروباری مسافروں کیلئے ایک اہم سہولت تصور کی جا رہی ہے۔ اس کے علاوہ ٹرین میں بین الاقوامی معیار کی ڈائننگ کار موجود ہوگی، جو معیاری کھانے اور خدمات فراہم کرے گی۔
یہ منصوبہ پاکستان ریلویز کی اپنے نظام کو جدید خطوط پر استوار کرنے اور مسافروں کو عالمی معیار کی سہولیات فراہم کرنے کی جاری کوششوں کا حصہ ہے۔ اس کا مقصد کراچی اور لاہور جیسے بڑے شہروں کے درمیان سفر کو تیز، محفوظ اور خوشگوار بنانا ہے۔