سکولوں میں گُڈ ٹچ بیڈ ٹچ سے متعلق شعور اور آگہی دینے کا فیصلہ

طلباو طالبات کیلئے اہم خبر، سکولوں میں گُڈ ٹچ بیڈ ٹچ سے متعلق آگہی دینے کا فیصلہ،محکمۂ داخلہ پنجاب نے سکول ایجوکیشن ڈیپارٹمنٹ کو گُڈ ٹچ بیڈ ٹچ سے آگہی و شعور دینے کے حوالے سے مراسلہ بھیج دیا۔
اس مراسلے میں کہا گیا ہے کہ ’گُڈ ٹچ بیڈ ٹچ‘ سے آگہی بچوں کے نصاب میں شامل کی جائے، بچوں کو ذاتی حفاظت کے بارے میں تعلیم دینا وقت کی ضرورت ہے۔
مراسلے کے مطابق ابتدائی کلاسز کے سلیبس میں گُڈ ٹچ بیڈ ٹچ کے بارے میں آگہی کو شامل کیا جائے، درست تعلیم اور آگاہی کے بعد بچے نامناسب رویے کو پہچان کر رپورٹ کر سکتے ہیں، والدین اور اساتذہ بچوں کو بتائیں کہ گھر اور باہر نامناسب رویے کو کیسے رپورٹ کیا جائے۔
مراسلے میں کہا گیا ہے کہ جنسی استحصال کا شکار بچے زندگی بھر ٹراما میں رہ سکتے ہیں، بچوں کو محفوظ بنانا اور استحصال کرنیوالوں کو قانون کے شکنجے میں لانا ریاست کی ذمہ داری ہے۔ مراسلے میں یہ بھی کہا گیا ہے کہ بچوں کو سکھایا جائے کہ جنسی استحصال کی کوشش کرنیوالوں سے ڈرنا نہیں، بلکہ ان کو بے نقاب کرنا ہے۔ بچوں کے نصاب میں گُڈ ٹچ بیڈ ٹچ ماڈیول شامل کرنے کیلئے ماہرین سے مدد لی جائے۔
مراسلے کے مطابق معاملے کی حساسیت کے پیشِ نظر مستقبل کی نسلوں کو محفوظ بنانے کیلئے فوری حکمتِ عملی مرتب کی جائے گی۔