صارفین کیلئےایکس(ٹوئٹر)میں نئی تبدیلی کی تیاری

دنیا بھر میں مقبول سماجی رابطے کی ویب سائٹ ایکس(ٹوئٹر) میں ایک نئی تبدیلی لانے کی تیاری کرلی گئی۔ایکس کے مالک ایلون مسک نے بھی تصدیق کردی ۔
ٹیکنالوجی ماہرین کے مطابق ایکس کے ٹائم لائن ڈیزائن کو تبدیل کیا جائے گا۔ ایکس انتظامیہ کا منصوبہ ہے کہ صارفین کے فیڈز میں مواد کو ظاہر کرنے کے طریقے کو دوبارہ ڈیزائن کرے، اس کا مطلب ہے کہ پوسٹس پر ری پوسٹ، لائک اور جواب دینے کے بٹن صارفین کی ایکس ٹائم لائن پر ظاہر ہی نہیں ہوں گے۔
ایکس چاہتا ہے کہ صارفین بٹن پر ٹیپ کرنے کی بجائے کسی پوسٹ کو پسند یا جواب دینے کیلئے بائیں یا دائیں سوائپ کریں۔ آئی او ایس صارفین کسی پوسٹ پر ٹچ کرکے مزید اختیارات کے ساتھ مینو کھول سکتے ہیں،تاہم یہ واضح نہیں ہوسکا کہ اگر ویڈیو کو ری پوسٹ کرنا ہوگا یا اس پر کوئی کمنٹس کرنے ہوں گے تو اسے کس طرح دائیں اور بائیں جانب سوائپ کیا جا سکے گا، تاہم امکان ہے کہ ایکس کا ٹائم لائن اس طرح بنایا جائے گا کہ اس پر ہر پوسٹ کو سوائپ کیا جا سکے گا۔
ابھی یہ بھی واضح نہیں کہ یہ انقلابی تبدیلی کب تک عمل میں آئے گی ؟تاہم امکان ہے کہ اسے آئندہ 6 ماہ کے اندر پیش کردیا جائے گا۔