عالمی برادری مسئلہ کشمیر اور فلسطین کاپُرامن حل یقینی بنائے،خواجہ آصف

وفاقی وزیردفاع خواجہ آصف نےکہاہےکہ عالمی برادری مسئلہ کشمیر اور فلسطین جیسے دیرینہ حل طلب تنازعات کا پُرامن حل یقینی بنائے، ایسے حل طلب تنازعات عالمی امن و سلامتی کے لیے مستقل خطرہ بنے ہوئے ہیں۔
چین کےمشرقی ساحلی شہر چنگ ڈاؤ میں شنگھائی تعاون تنظیم کااجلاس منعقدہواجس میں پاکستان ،روس ،ایران، بیلاروس اور دیگر ممالک کے وزرائے دفاع نے شرکت کی۔ ایس سی او اجلاس میں پاکستان کی نمائندگی وزیردفاع خواجہ آصف نےکی۔
وزارت دفاع کی جانب سے جاری اعلامیے کے مطابق وزیر دفاع خواجہ آصف نے ایران کے خلاف اسرائیل کی بلاجواز اور غیرقانونی فوجی کارروائیوں کی مذمت کی ، انہوں نے غزہ میں پرتشدد کارروائیوں اور انسانی بحران پر گہری تشویش کا اظہار کیا۔
پاکستانی وزیردفاع نےایس سی اوکے اصولوں اور مقاصد سے پاکستان کی غیر متزلزل وابستگی کا اعادہ کیا جبکہ عالمی سطح پر جاری تنازعات پر شدید تشویش کا اظہار کیا۔
اجلاس سےخطاب کرتےہوئے وزیردفاع خواجہ آصف کاکہناتھاکہ دہشتگردی ایک مشترکہ خطرہ ہے جس سے اجتماعی طور پر نمٹنےکی ضرورت ہے، تمام ریاستیں دہشتگردی کےخلاف مشترکہ کوششوں کو سیاسی رنگ دینے سے گریز کریں، خطے کی پائیدار خوشحالی کے مشترکہ وژن کے حصول کےلیے پر امن اور مستحکم افغانستان ضروری ہے۔
اُن کامزیدکہناتھاکہ غزہ میں فوری طور پرمستقل جنگ بندی نافذ کی جائے، عالمی برادری مسئلہ کشمیر اور فلسطین جیسے دیرینہ حل طلب تنازعات کا پُرامن حل یقینی بنائے، ایسے حل طلب تنازعات عالمی امن و سلامتی کے لیے مستقل خطرہ بنے ہوئے ہیں۔