لیفٹیننٹ جنرل (ر) فیض حمید کون ہیں؟اہم تفصیلات سامنے آ گئیں

لیفٹیننٹ جنرل (ر) فیض حمید کون ہیں؟اہم تفصیلات سامنے آ گئیں۔
آفیشل سیکرٹ ایکٹ کی خلاف ورزی کے الزام میں 14 سال قید بامشقت کی سزا پانے والے لیفٹیننٹ جنرل (ر) فیض حمید کا آبائی تعلق چکوال سے ہے۔ انہوں نے پاکستان آرمی میں بھرتی ہونے کے بعد بلوچ رجمنٹ میں شمولیت اختیار کی۔
فیض حمیدنےاپنی عسکری خدمات کے دوران انٹیلی جنس اور انسداد جاسوسی کے شعبوں میں اہم کردار ادا کیا۔انہوں نے آئی ایس آئی کے کاؤنٹر انٹیلی جنس سیکشن میں ڈی جی کے فرائض انجام دیے۔
راولپنڈی میں ٹین کور کے چیف آف سٹاف بھی رہے۔16جون 2019 کو فیض حمید کو ڈی جی آئی ایس آئی مقرر کیاگیا۔ جب سابق وزیر اعظم عمران خان کی حکومت تھی۔ بطور سربراہ آئی ایس آئی اُن کی مدت ملازمت میں ملکی اور علاقائی سیکیورٹی معاملات میں کافی توجہ ملی۔ افغانستان میں طالبان کے اقتدار سنبھالنے کے بعد ان کی ایک تصویر کابل میں وائرل ہوئی، جس نے اُن کی خطے میں کسی حد تک کردار کی نمائش کی۔ اُن کے دور میں بعض مبصرین نے سیاسی اور عسکری معاملات میں مبینہ مداخلت کے الزامات بھی لگائے۔ اکتوبر 2021 میں انہیں کور کمانڈر پشاور مقرر کیا گیا اور بعد میں کور کمانڈر بہاولپور بھی بنایا گیا۔
فیض حمید پاکستان آرمی کے چند سینئر ترین افسران میں سے تھے جن کے نام چیف آف آرمی سٹاف جیسے اعلیٰ عہدوں کے لیے بھی سامنے آئے۔ اُن کی خدمات اور تنازعات نے ملک کی عسکری اور سیاسی بحثوں میں خاصی توجہ حاصل کی۔