ماحولیاتی چیلنجز سے نمٹنے کیلئے پانی کے ذخائر ناگزیر ہیں، وزیراعظم

وزیراعظم شہباز شریف نے کہا ہے کہ ماحولیاتی تبدیلیوں کے چیلنجز سے نمٹنے کے لیے پانی کے نئے ذخائر کی تعمیر وقت کی اہم ضرورت ہے اور ملک میں متعدد چھوٹے ڈیمز بنانے کی صلاحیت موجود ہے۔
نارووال میں وزیر اعلیٰ پنجاب مریم نواز، وفاقی و صوبائی وزراء اور این ڈی ایم اے کے حکام سے خطاب کرتے ہوئے وزیراعظم کا کہنا تھا کہ حالیہ بارشوں سے گلگت بلتستان اور خیبرپختونخوا میں جانی و مالی نقصان ہوا ہے، جبکہ پنجاب کے میدانی علاقوں میں شدید طغیانی دیکھی جا رہی ہے۔ سیلاب کے نتیجے میں انسانی جانوں کے ضیاع پر ہم سب افسردہ ہیں۔
انہوں نے کہا کہ پنجاب حکومت ،ریسکیو ادارے، پولیس اور محکمہ ایریگیشن دن رات محنت کر رہے ہیں، جنہیں میں دل سے مبارکباد پیش کرتا ہوں۔ ان کے ٹیم ورک کی بدولت نقصان کو کم سے کم رکھنے میں کامیابی حاصل ہو رہی ہے۔
وزیراعظم نے یاد دہانی کرائی کہ 2022 میں بھی اسی نوعیت کی قدرتی آفت نے ملک کو متاثر کیا تھا، جب سندھ اور بلوچستان میں لاکھوں ایکڑ پر تیار فصلیں تباہ ہو گئی تھیں۔
انہوں نے کہا کہ پاکستان ان ممالک میں شامل ہے جو ماحولیاتی تبدیلی کے اثرات سے سب سے زیادہ متاثر ہو رہے ہیں، اور آئندہ برسوں میں ان چیلنجز کا سامنا مزید شدت سے ہوگا۔ اسی لیے پانی ذخیرہ کرنے کی گنجائش میں اضافہ کرنا ہوگا اور اس کے لیے ہمیں اپنے وسائل کا مؤثر استعمال کرنا ہوگا۔