نوکیا چاند پر اپناپہلا 4 جی نیٹ ورک پہنچانے میں کامیاب

امریکی خلائی ادارے اور فن لینڈ کی کمپنی نوکیا کا مشترکہ طور چاند پر پہلے 4 جی نیٹ ورک کی تنصیب کے منصوبے میں اہم پیشرفت، نوکیا چاند پر پہلا 4 جی نیٹ ورک پہنچانے میں کامیاب ، مگر نیٹ ورک کام کرنے میں ناکام ہو گیا۔
امریکی خلائی نجی کمپنی Intuitive Machines کے آئی ایم 2 نامی مشن کے ذریعے نوکیا کے تیار کردہ 4 جی ایل ٹی ای سسٹم چاند کی سطح پر بھیجا گیا۔ 6 مارچ کو آئی ایم 2 مشن پہلو کے بل چاند پر اترا اور کمپنی نے 7 مارچ کو مشن کوفوری ختم کرنے کا اعلان کر دیا۔
یوں نوکیا کا 4 جی نیٹ ورک منصوبے کے مطابق تو چاند پر نصب نہیں ہوسکا ،مگر کمپنی کا دعویٰ ہے کہ اس نے چاند پر پہلے سیلولر نیٹ ورک کو پہنچا دیا ہے۔آئی ایم 2 لینڈر کے اندر اب بھی نوکیا کا نیٹ ورک موجود ہے اور کمپنی کے مطابق باکس میں موجود نیٹ ورک کامیابی سے کچھ وقت تک کام کرتا رہا، جو صرف 25 منٹ تک آن لائن رہا ،جس کے بعد پاور آف ہوگیا۔
ماہرین کے مطابق اس 4 جی سسٹم کو ایچ ڈی ویڈیوز، میسجز اور دیگر ڈیٹا بھیجنے کیلئے ڈیزائن کیا گیا ہے اوریہ نیٹ ورک بہت زیادہ درجہ حرارت، ریڈی ایشن اور خلائی ماحول میں کام کرنے کے قابل ہے، لہٰذاآئندہ برسوں میں ناسا کے آرٹیمس 3 مشن کے تحت انسانوں کو چاند کے قطب جنوبی میں بھیجا جائے گا اور 4 جی نیٹ ورک ان کیلئے انتہائی اہم ثابت ہوگا۔