ٹھوس، مائع ،گیس کے علاوہ پانی کی چوتھی پرُاسرار شکل دریافت

ٹھوس، مائع ،گیس کے علاوہ پانی کی چوتھی پراسرار شکل دریافت،عام حالات میں پانی تین اشکال ٹھوس (برف)، مائع (پانی) اور گیس (بخار یا بھاپ) کی صورت میں پایا جاتا ہے، لیکن زمین سے باہر، کسی اجنبی دنیا میں پانی کی ایک مختلف شکل جسے ”پلاسٹک آئس سیون“ کہا جاتا ہے، موجود ہو سکتی ہے۔
ماضی میں کئی نظریاتی ماڈلز نے ”پلاسٹک آئس سیون“ کے وجود کی پیشگوئی کی، لیکن اب پہلی بار سائنسدانوں کو اس کے حقیقی وجود کا ثبوت مل گیا ہے۔ فرانس کے انسٹی ٹیوٹ لاو لانگویون کی بین الاقوامی تحقیقاتی ٹیم نے انتہائی جدید آلات کی مدد سے پانی کو 6 گیگا پاسکل کے دباؤ میں لے جا کر 327 ڈگری سینٹی گریڈ (620 ڈگری فارن ہائیٹ) تک گرم کیا، جس کے نتیجے میں یہ نئی شکل سامنے آئی، نئی تحقیق کے نتائج سائنسی جریدے ”نیچر“ میں شائع ہوئے ہیں۔
تحقیقی ٹیم نے اس مقصد کیلئے ”کوازی ایلاسٹک نیوٹرون سکیٹرنگ“ نامی طریقہ استعمال کیا ،جس کے ذریعے آبی ہائیڈروجن ایٹمز کی حرکات کو ٹریک کیا گیا، اس سے 17 سال پرانی ایک سائنسی پیشگوئی سچ ثابت ہو گئی کہ ”آئس سیون“ میں ہائیڈروجن ایٹمز مخصوص درجہ حرارت اور دباؤ پر مائیکرو لیول پر حرکت کرتے ہیں،تاہم تحقیق میں شامل سائنسدانوں کے مطابق یہ معلوم نہیں ہو سکا کہ جب یہ پلاسٹک آئس سیون ”پگھلتی“ ہے تو اس کی ساخت کس طرح تبدیل ہوتی ہے ؟
کچھ نظریات کے مطابق اس دوران مالیکیول اپنی جگہ برقرار رکھتے ہیں، جبکہ ہائیڈروجن ایٹمز حرکت میں آ جاتے ہیں۔
ماہرین کا ماننا ہے کہ نظامِ شمسی میں نیپچون، یورینس اور مشتری کے چاند ”یوروپا“ جیسے برفیلے سیارے ماضی میں پلاسٹک آئس سیون رکھتے ہوں گے۔ یہی وجہ ہے کہ ماہرین کا کہنا ہے کہ یہ دریافت خلائی اجسام کی جیوڈائنامکس اور ان کے ارتقائی عمل کو سمجھنے میں مدد دے سکتی ہے۔