پاکستان ، چین کے درمیان اسٹریٹجک شراکت داری مضبوط ہو رہی ہے، چینی وزیر خارجہ

چین کے وزیر خارجہ وانگ ژی نےکہاہےکہ چین پاکستان کو اپنا قابل اعتماد اتحادی تصور کرتا ہے، پاکستان اور چین کے درمیان اسٹریٹجک شراکت داری مضبوط ہو رہی ہے، پاکستان کے ساتھ تعلقات کو نئی بلندیوں تک لے جا رہے ہیں۔
پاکستان کے3روزہ دورےپرآئےچینی وزیرخارجہ وانگ ژی کاپاکستانی ہم منصب اسحاق ڈارکےہمراہ پریس کانفرنس کرتےہوئےکہناتھاکہ عوام کا شکر گزار ہوں اورشاندار میزبانی پر پاکستانی حکومت کاشکریہ اداکرتاہوں،ملاقات میں دونوں ملکوں کے درمیان مختلف امور پر گفتگو ہوئی اورسی پیک فیز ٹو پر بھی تفصیل سےگفتگوہوئی۔
چینی وزیرخارجہ کامزیدکہناتھاکہ علاقائی امن و استحکام ہمارا مشترکہ ہدف ہے، چین پاکستان کو اپنا قابل اعتماد اتحادی تصور کرتا ہے، پاکستان اور چین کے درمیان اسٹریٹجک شراکت داری مضبوط ہو رہی ہے، پاکستان کے ساتھ تعلقات کو نئی بلندیوں تک لے جا رہے ہیں۔وزیراعظم شہباز شریف کے دورہ چین کے منتظر ہیں۔
وزیرخارجہ اسحاق ڈارکاپریس کانفرنس کےدوران کہناتھاکہ پاکستان کی سالمیت اور خودمختاری کے تحفظ کے لیے چین کے عزم کو سراہتے ہیں، خطے کے امن و استحکام اور خوشحالی کے لیے مل کر کام کرنے کے لیے پرعزم ہیں۔
اُن کامزیدکہناتھاکہ چین کے وزیر خارجہ کے ساتھ مفید بات چیت ہوئی، ملاقات میں باہمی دلچسپی کے امور پر بات چیت کی گئی، سی پیک سمیت پاک چین تعلقات سے متعلق تمام پہلوؤں کا جائزہ لیا گیا۔
اسحاق ڈار کا کہنا تھا سی پیک فیز2، عوامی سطح پر روابط اور دوطرفہ تعاون کو وسعت دینے کے لیے پرعزم ہیں، سلامتی کونسل سمیت مختلف فورمز پر ایک دوسرے کی حمایت کے لیے بھی پرعزم ہیں۔تمام اہم معاملات پر اتفاق رائے موجود ہے۔