پاکستان کاجشن معرکہ حق : 75 روپے کاخوبصورت یادگاری سکہ جاری

جشن معرکہ حق کی مناسبت سے 75 روپے کاخوبصورت یادگاری سکہ جاری۔
سٹیٹ بینک آف پاکستان نے جشن ِ معرکۂ حق اور 78 ویں یومِ آزادی کے موقع پر 75 روپے مالیت کا یاد گاری سکہ جاری کردیا ۔حکومت ِ پاکستان کی ہدایت پر جاری کیے گئے اس سکّے کی دھاتی ساخت میں 79 فیصد تانبہ، 20 فیصد زنک اور ایک فیصد نکل شامل ہے، سکّے کا وزن 13.5 گرام اور قطر 30 ملی میٹر ہے،سکّے کے سامنے کے رخ پر وسط میں بڑھتا ہوا ہلال اور پانچ نوکوں والا ابھرتا ہوا ستارہ کندہ ہے، جس کا رخ شمال مغرب کی طرف ہے۔
ستارے اور ہلال کے اوپر ”اسلامی جمہوریہ پاکستان“ کے الفاظ درج ہیں، جبکہ چاند کے نیچے گندم کی دو خمیدہ بالیوں کے اوپر اجرا کا سال 2025لکھا گیا ہے۔ ہلال اور ستارے کے دائیں اور بائیں جانب بالترتیب 75روپیہ تحریر ہے۔سکّے کے پچھلے رخ پر وسط میں معرکۂ حق درج ہے، جبکہ نیچے کی جانب دو لڑاکا طیارے، ایک بحری جہاز اور ملٹی پل راکٹ لانچر سسٹم کی ابھری ہوئی تصاویر موجود ہیں، جو مسلح افواج کی صلاحیت اور قربانیوں کی نمائندگی کرتی ہیں۔
بالائی کناروں پر پاکستان ہمیشہ زندہ باد کے الفاظ درج ہیں۔یہ یادگاری سکّہ 15 اگست 2025 سے سٹیٹ بینک بینکنگ سروسز کارپوریشن کے فیلڈ دفاتر میں ایکسچینج کاؤنٹرز پر دستیاب ہے۔