پنجاب میں سو یونٹ استعمال کرنے پر سولر سسٹم مفت دیے جائیں گے

لاہور: پنجاب حکومت نے سالانہ بجٹ برائے 25-2024 میں سولر سسٹم مفت فراہم کرنے کا اعلان کر دیا۔

جمعرات کو وزیر خزانہ پنجاب مجتبیٰ شجاع الرحمان نے 5 ہزار 446 ارب کا صوبائی بجٹ پیش کیا جسے ٹیکس فری قرار دیا گیا ہے۔

جس میں وزیر خزانہ مجتبیٰ شجاع الرحمان نے بجٹ سے پنجاب کی ترقی اور خوشحالی کا نیا دور شروع ہوگا، 9 ارب 50 کروڑ لاگت سے وزیر اعلیٰ روشن گھرانہ پروگرام کا اجرا کیا جا رہا ہے۔

پروگرام کے پہلے مرحلے میں 100 یونٹس استعمال کرنے والے صارفین کو مکمل سولر سسٹم فراہم کیا جائے گا۔ سولر سسٹم لگانے کے تمام اخراجات پنجاب حکومت دے گی، 10 ارب کی لاگت سے اپنی چھت اپنا گھر کے تحت غریبوں کو گھر دے رہے ہیں۔

صوبائی وزیر خزانہ نے بجٹ تقریر میں کہا کہ دیہی علاقوں میں ڈیری فارمنگ کیلیے آسان اقساط پر قرضے فراہم کیے جا رہے ہیں، 8 ارب کی لاگت سے ماڈل فش مارکیٹ کا قیام کیا جائے گا، 80 ارب کی لاگت سے چیف منسٹر ایس ٹی جی پروگرام کا آغاز ہوگا۔

علاوہ ازیں 9 ارب روپے کی لاگت سے چیف منسٹر سولرائزیشن آف ایگری کلچر ٹیوب ویلز پروگرام شروع کیا جا رہا ہے، جس کے تحت 7 ہزار ٹیوب ویلز کو سولر پر منتقل کیا جائے گا۔