پی آئی اے نے لاہور سے پیرس کیلئے پروازوں کا آغاز کردیا

فضائی مسافروں کیلئےخوشخبری،پی آئی اے نے لاہور سے پیرس کیلئے پروازوں کا آغاز کردیا۔
قومی ایئرلائن پی آئی اے نے پانچ سال کے طویل وقفے کے بعد لاہور سے پیرس کیلئے پروازوں کا باقاعدہ آغاز کردیا۔
ذارئع کے مطابق 5 سال کے بعد پی ائی اے نے لاہور سے پیرس کا روٹ دوبارہ شروع کیا، جس کے تحت پی آئی اے کی گزشتہ روز پہلی ہفتہ وار پرواز پی کے 733، 276 مسافروں کو لیکر پیرس کیلئے دوپہر 12 بجے روانہ ہوئی۔
ترجمان پی آئی اے کے مطابق پرواز کیلئے بوئنگ 777 طیارہ آپریٹ کیا گیا، جس میں مسافروں کی سہولت کیلئے حال ہی میں از سر نو تزئین و آرائش کی گئی ہے۔پیرس جانیوالی پرواز کے آغاز پر علامہ اقبال انٹرنیشنل ایئرپورٹ پر ایک سادہ مگر پروقار تقریب کا انقاد کیا گیا اور کیک کاٹا گیا۔
تقریب کے موقع پرچیف ایگزیکٹو آفیسر پی آئی اے ایئر وائس مارشل عامر حیات، چیف آپریٹنگ افسر خرم مشتاق، فرانس ایمبیسی کے ہیڈ آف مشن فرینک آبرے اور ہوابازی کے دیگر اعلیٰ حکام نے پہلی پرواز کے مسافروں کو رخصت کیا۔پی آئی اے پہلے ہی اسلام آباد سے پیرس کی ہفتہ وار دو پروازیں آپریٹ کررہی تھی،تاہم اب لاہور سے بھی مسافروں کو پیرس جانے کی سہولت میسر آئےگی۔