چیئرمین پی سی بی ٹیم میں سرجری کے بیان سے پیچھے ہٹ گئے
![](https://pakistantoday.tv/wp-content/uploads/2024/06/Mohsin-Naqvi-1-905x400.jpg)
اسلام آباد : بھارت سے شکست کے بعد قومی کرکٹ ٹیم میں بڑی سرجری پر تیار پاکستان کرکٹ بورڈ (پی سی بی) کے چیئرمین محسن نقوی اپنے بیان سے پیچھے ہٹ گئے۔
نجی ٹی وی سے گفتگو میں چیئرمین پی سی بی کا کہنا تھا کہ ابھی میچز باقی ہیں، ٹیم کو سپورٹ کی ضرورت ہے۔ ٹورنامنٹ کے حتمی نتیجے کا انتظار کرنا چاہیے، سب لوگ دعا کر رہے ہیں کہ ٹیم آگے پہنچے۔ مشاورت جاری ہے فی الحال اس موقع پر اس حوالے سے مزید بات کرنا مناسب نہیں، جیسی بھی ٹیم ہے اسے لیکر اس ٹورنامنٹ میں آگے چلنا ہے۔
واضح رہے کہ اس سے قبل بھارت کے خلاف بڑے میچ میں قومی ٹیم کی شکست پر مایوسی کا اظہار کرتے ہوئے چیئرمین پی سی بی محسن نقوی نے کہا تھا کہ آج کی شکست ہر لحاظ سے مایوس کن تھی، پاکستانی کرکٹ اس وقت اپنی سب سے کم درجہ کی پر فارمنس پر ہے۔
انہوں نے کہا کہ لگتا تھا کہ کرکٹ ٹیم کا چھوٹی سرجری سے کام چل جائے گا لیکن انتہائی خراب کارکردگی کے بعد یقین ہوگیا ہے کہ ٹیم میں بڑی سرجری کی ضرورت ہے۔ چیئرمین پی سی بی کا کہنا تھا کہ قوم جلد بڑی سرجری ہوتے ہوئے دیکھے گی تاہم ہمارا سب سے بڑا چیلنج ٹیم کی کارکردگی کو بہتر بنانا ہے۔