کرسمس اور قائد ڈے پر سیاحتی مقامات کی سکیورٹی کیلئے اضافی نفری تعینات

سیاحت اور مذہبی رواداری کےفروغ کیلئے اہم اقدام، کرسمس اور قائد ڈے پر سیاحتی مقامات کی خصوصی سکیورٹی کا اہتمام،یوم قائد اور کرسمس کے مذہبی تہوار کے موقع پر صوبہ پنجاب سمیت ملک بھر کے سیاحتی مقامات کی فول پروف سکیورٹی کیلئےاضافی نفری تعینات کی گئی۔
ترجمان پنجاب پولیس کے مطابق ہر دلعزیز سیاحتی مقام ملکہ کوہسار مری اور لاہور سمیت صوبے کے تمام چھوٹے بڑے شہروں میں کرسمس اور قائد ڈے پر خصوصی انتظامات کیے گئے ہیں۔ اس موقع پر سرکاری و نجی سطح پر بانیٔ پاکستان قائداعظم محمد علی جناح کے یوم پیدائش کی مناسبت سے ہونیوالی تمام تقریبات کو بھی سکیورٹی فراہم کی گئی ہے۔
ترجمان پنجاب پولیس کے مطابق صوبے کے تمام اضلاع میں واقع مسیحی عبادت گاہوں چرچز اور پبلک پلیسیز پر بھی تین سےچار درجہ کی سکیورٹی فراہم کی گئی ہے،جبکہ حساس اور اے کیٹیگری چرچز میں واک تھرو گیٹس، سکینرز نصب کرنے کیساتھ میٹل ڈ ٹیکٹرز سے جامع تلاشی کو یقینی بنایا جا رہا ہے۔ خواتین سیاحوں اور شہریوں کی سہولت کیلئے لیڈی پولیس اہلکار مسیحی عبادت گاہوں اور پارک میں سکیورٹی پر تعینات ہیں۔
تفریحی مقامات بالخصوص پارکوں، پکنک پوائنٹس کی سکیورٹی کیلئے اضافی نفری تعینات کی گئی ہے ،تاکہ مسیحی برادری پرُ امن ماحول میں اپنے مذہبی تہوار کی خوشیاں منا سکیں۔ بڑے گرجا گھروں کے باہرگاڑیوں کی تلاشی کے ساتھ پارکنگ کیلئے مناسب فاصلے پر معقول انتظام کیا گیا ہے۔
حساس پوائنٹس پر کوئیک رسپانس اور ایلیٹ پولیس ٹیمیں بھی ایمرجنسی ایکشن کیلئے تعینات ہیں۔ سکیورٹی کیلئے اضافی نفری تعینات کرنے کا مقصد وطن عزیز پاکستان میں کر سمس، نیو ائیر اور قائد ڈے کے موقع پر سیاحت کا فروغ اور امن و امان کو یقینی بنانا ہے۔